Divendres de ser, los Dragons Catalans jogavan a Castleford, dins l’estadi The Jungle,un endreit ont capitan pas gaire de véncer. Aqueste còp, faguèron una brava diferéncia dins lo primièr temps e finiguèron que ganhèron: 46-22 amb 8 ensags de marcats.

Los Dragons se trapan atal a la perseguida del primadièr Warrington (20 punts) en companhiá de Wigan e d’Hull KR (16 punts). Justament, serà Warrington que serà l’òste de Brutus aqueste dissabte 20 de mai per jogar lo ueiten de finala de la Cup.

En Championship, d’un tombat a la 75a minuta, Batley bat Tolosa 17-16.

Elèit 1: Carcassona-Limós en finala del campionat

Aquesta dimenjada, se jogavan las mièjas finalas del campionat de França.

Dissabte, Carcassona recebiá Albi. Los tarneses, fòrts de las leiçons de la desfaita de la finala de la Copa, se mostrèron mai solidaris e mai entreprenents. Atal, a 5 minutas del tèrme, menavan 16-14; calguèt una carga bèla del segonda-linha Mulhall, un relèu amb lo dobertura Herrero per mandar l’electron liure Morgan Escarré marcar l’ensag decisiu. Sus la còrna, Vincenç Albèrt recuperava una palma perduda pels Tigres per fortificar la qualificacion dels locals: 26-16.

Dimenge, Limós recebiá Lesinhan. Pel tresen còp de la sason, los limosencs s’impausèron 36-10 a una formacion tròp penalizada que capitèt pas de bastir un jòc constuctiu per contrar lo vam local.

Coma en 2022, los dos fraires enemics vesins se tornaràn trapar lo dimenge 28 de mai a l’Egassieral de Narbona per conquistar lo trofèu Max-Rousié.

Un dimenge de finalas

Aqueste dimenge 21 de mai, se jogarà la finala d’Elèit 2 a Pàmias, entre los catalans d’Illa e los roergasses de Vilafranca. A Pià, se tendràn las finalas de Nacionala (Ferrals-Palau) e de Federala (los Vals-Pujòls).

NRL: los Lapinons en cap de classament

Los Lapinons, venceires dels Tigres (20-0), prenon la primièra plaça del classament NRL als Cavals Fòls de Brisbane batuts a Melbourne (16-24). Los Polets prenon una rosta a Penrith (4-48). Victòrias al defòra pels neozelandeses cò dels Dògols (24-12) e per las Làmias cò de Manly (20-14).

Darrièra minuta: pas de Copa del Mond en 2025 en França

Dins un comunicat mandat aqueste diluns de vèspre, la Federacion anóncia : “França organizarà pas la Copa del Mond del XIII en 2025”. Tornarem sus aquesta informacion dins las cronicas venentas.