Bandièra01 1180x150: Comuna de Tolosa

Actualitats

Bessilhas aculhirà lo 24n recampament dels calandrons de Lengadòc

Lo 6 de junh que ven, los calandrons escambiaràn en occitan a prepaus de “ las retrobalhas”, a l’entorn de jòcs, d’obradors e d’espectacles

A l’entorn del tèma “las retrobalhas”, se recamparàn lo dimars 6 de junh, a Bessilhas (País de Tau) los escolans de las escòlas Calandreta de Lengadòc
A l’entorn del tèma “las retrobalhas”, se recamparàn lo dimars 6 de junh, a Bessilhas (País de Tau) los escolans de las escòlas Calandreta de Lengadòc

Tèxte legit

A l’entorn del tèma “las retrobalhas”, se recamparàn lo dimars 6 de junh, a Bessilhas (Montanhac, País de Taur) los escolans de las calandretas de Lengadòc. S’agís d’una jornada d’escòla en defòra de la classa e es lo ponch d’òrgue d’un trabalh pedagogic menat long de l’annada entre las escòlas associativas occitanas.

Pendent aquela jornada, los calandrons escambiaràn en occitan sus aquel tèma a l'entorn de jòcs, d’un obrador e d'un espectacle creats e jogats pels escolans del collègi Calandreta Clardeluna de Marauçan (Besierés).

La Federacion Regionala Calandreta Lengadòc compta a l’ora d’ara 27 establiments, que son 24 escòlas, dos collègis, e un licèu. En tot, escolarizan 1989 calandrons de la pichòta seccion fins a la terminala. Totes aqueles establiments e mai l’escòla Calandreta de Milhau participaràn al recampament.

Las escòlas Calandreta, escampilhadas per tota Occitània, son d’escòlas laïcas e associativas qu’an un contracte amb l’estat, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. La relacion entre los professors e las familhas es fòrça estrecha e los parents se pòdon engatjar dins lo projècte fins ont vòlgan. A mai, cada calandreta a una estrecha relacion amb son entorn immediat, e aital la coneissença de la realitat pròcha e l’engatjament dels escolans amb l’entorn son plan elevats. Ara per ara comptan mai de 3900 escolans repartits sus una vintena departaments.

 

 


24n recampament de calandrons de Lengadòc,
dimars 06 de junh de 2023 de 9h a 15h,
a la basa departementala de Bessilhas
près de Montanhac

 


Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

P. Pojada
1.

Es, evidentament, una plan bona e importanta iniciativa e me'n regaudissi. Ça que la, m'es tot còp estranh que se parle de Lengadòc per parlar pas que d'una partida del Lengadòc que la capitala n'èra Tolosa e que s'espandissiá (s'espandís encara?) entram Ròse e Garona, tot concernint tanben, solide, Velai e Vivarés. Que Milhau, fòra Lengadòc, i participe, fòrça plan, segur. Mas perqué, encara, parlar de Lengadòc quand se tracha pas que d'una partida del Lengadòc? L'occitanisme poiriá, benlèu, pensar a las apellacions que fa servir, qualques còps. Mas, me diretz, avèm plan una region "Occitània/Occitania" (que cadun causisca la forma/fòrma que li agrada e que li agrade), qu'es pas qu'un bocin dels païses occitans. Alavetz, perqué pas un Lengadòc qu'es pas qu'un tròç de Lengadòc?

  • 1
  • 0

Escriu un comentari sus aqueste article