Deth 3 ath 6 d’abriu, 46 escolans de 4au deth collègi comengés d’Aurinhac que partiren en viatge de descobèrta en Peirigòrd. Aqueth viatge, organizat peths professors d’Occitan e de Latin, que les permetec de visitar Peiriguers, Sarlat, eth podac de Promeissac e era bastida de Montpasièr.
Eths escolans que profitèren tanben dera visita de Peiriguers nà participar ara emission ocitana de France Bleu Périgord, Meitat chen, meitat pòrc, qu’estèren arrecebuts pera Agéncia culturala departamentala on les expliquèren eth trebalh hèt enà amassar e difusar era cultura orala de Dordonha.
Qu’arrencontrèren tanben Martial Peyrouny, professor d’occitan ara ciutat escolara Bertran de Bòrn, e eths sòns escolans de 4au. Despuish eth debut dera annada, eths collegians comengeses qu'avián enviat fichièrs audio enregistrats en classa nà presentà's, presentar eth sòn collègi e parlar deth Comenge. Eths collegians lemosins qu'avián, eris, creat un blòg. Pendent era vrespada que passèren amassa, eths gafets d’Aurinhac que joguèren ua pèça de teatre en occitan, eths de Peiriguers que les presentèren filmòts en lemosin e era vrespada que s’acabèc en tot cantar cançons de Nadau. Qu'estèc ua estona plan conviviala on cadun se podec avisar que, maugrat eras diferéncias dialectalas, arribava a comprénguer sense dificultat eth parlar deth aute.
Joan Pau Ferré
Joan Pau Ferré
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari