Bandièra01 1180x150: Comuna de Tolosa

Actualitats

Apologia nazi en una corrida a Madrid

Un enòrme tag nazi protagonizèt una corrida a Pinto, près de Madrid, dins l’encastre de las fèstas. S’i podiá legir lo tèxt “Adolf Hitler aviá rason”, acompanhat d’una crotz gammada. L’espectacle se passèt tot entièr presidit per aquela frasa. Un grop antifaissista del País Valencian ne difondèt l’imatge sus Twitter.
 
Lo legista e òme politic Alfons López Tena especifiquèt que dins l’estat espanhòl “l’apologia del nazisme es pas un delicte, sonque l’apologia del genocidi”. Al delà, López Tena planhiá que los procuraires agisson pas e que los jutges aquitan aquel tipe de faches.
 
La consolessa de Pinto, Miriam Rabaneda, mostrèt son refús, condemnèt lo tag mas lo faguèt pas escafar abans la fin de l’espectacle. Segon Rabaneda, quand o vegèron l’arena èra dobèrta e avián pas lo temps de l’escafar.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid
2.

Quand admetem qu'ei legitim de tuar ua bèstia peu plaser, que sia estetic (espiar la bèstia morir) o gustatiu (minjar la soa carn), n'èm pas luenh d'adméter qu'ei legitim de tuar umans, judius o pas.

Que naishem tots dab ua grana sensibilitat a la dolor deus autes, umans o bèstias. Las ideologias guerrièras e especistas* que'ns vòlen har mespresar aquesta sensibilitat, que la nse vòlen har estofar entà que posca continuar la cultura deu murtre legitimat.

Tà jo corrida e genocide que son part deu mème continuum dens la demarcha qui hè lo tuaire entà har carar la soa sensibilitat a la dolor e a la mort deus autes.

Mes ne sèi pas si parli clar... Abans de'm balhar un punt Goodwin, questionatz-me si ne'm comprenetz pas svp.

*especisme : ideologia qui preten qu'ua espècia (en generau umana) ei superiora a totas las autas

  • 1
  • 0

Escriu un comentari sus aqueste article