Bandièra01 1180x150: Comuna de Tolosa

Actualitats

crotz-tolosaCreated with Sketch.GuianaAgenésNaut Agenés

Ua EOE 2013 au bèth miei deu camin

Maugrat lo succès, l’Escòla Occitana d’Estiu que viu ua situacion financièra complicada

Lo cors de gascon
Lo cors de gascon
Dab la crisi l’Escòla Occitana d’Estiu (EOE) que viu moments dificils. Las subvencions non son pas mei çò qu’èran. En mei d’aquò los catalans deu CAÒC, qui vienèvan numerós, non son pas mei qu’un punherat. Las resèrvas financièras que son de las magras. Mes avançar que cau.
 
Totun, deu 18 au 24 d’agost, que’s tienó la 39u EOE a Vilanuèva d’Òut (Naut Agenés) dab efectius estables e dilhèu en leugèra aumentacion. Que i avó mei d’un centenat d’estagiaris. La majoritat que seguín cors en lengadocian, mes que cau notar los dialèctes gascon e lemosin que son mei anar mei presats.
 
Aqueths cors benefician deu labèl Parlesc e qu’estón assegurats per professionaus especialistas. Cadun que’s pòt causir lo nivèu e la durada deu cors (duas òras per dia a sheis òras per dia). Qu’estón prepausats tanben talhèrs dab activitats de las divèrsas: onomastica, istòria, contes, jòcs, dança… En mei, que’s podèva assistir a conferéncias.
 
Los mainatges e los adolescents, numerós, que participèn a la vita de l’escòla. Qu’èran un trentenat augan. L’EOE tota que’s hè en occitan. Atau, l’estanquet qu’atracè un ahoalh de monde pr’amor d’un ambient de convivéncia on los estagiaris e podón escambiar dens tots los dialèctes e sustot que cantèn. Las seradas tanben qu’estón animadas: contes, danças dab Fai Deli, Lo Lop e La Lèbre, Guilhèm López e lo Bal en Companhiá, cançons de la joena aranesa Alidé Sans, teatre dab La Patacada, ua pèça vielha de Marcèu Esquiu. De notar que la joenessa e son talentuós. Autan Fai Deli com Alidé Sans qu’estrambordèn aus estagiaris.
 
Peu moment, gràcias a ua gestion rigorosa, a la generositat deus artistas e a l’implicacion deus benevòls, l’anonci que’s hasó deu debanament de l’Escòla Occitana d’Ivèrn 2014 a Burlats, en Albigés. Qu’estó tanben anonciada la 40u Escòla Occitana d’Estiu en agost de 2014. L’EOE que demorarà a Vilanuèva d’Òut e non s’envolarà pas tà Soïssa o tà Singapor…
 
 
 
Nicolau Rei Bèthvéder
 



Vidèo: Alidé Sans que canta Harànreggae a la serada finau de l’EOE a la Plaça La Faieta de Vilanuèva d’Òut, lo 23 d’agost
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Eric Arbanats 33
1.

Çò de mei important : l'estanguet, quitament se n'i a que disen estanquet. Lòc de practica per excelléncia, la vita de tot dia en lenga nòsta, per apracticar çò qui s'estudia pendent los cors. Visca l'EOE, macarèu !

  • 7
  • 0

Escriu un comentari sus aqueste article