Bandièra01 1180x150: Comuna de Tolosa

Actualitats

Las vacancas de Pascas

| Òme deu Teishenèir
Quantes n’aurà escriches de romans Sèrgi Gairal? Sabi pas exactament que ieu legissi pas que los que pareisson en version unilingüa. Mas sabi sa produccion abondosa e es una vertadièra benediccion per la literatura nòstra. Per çò que Sèrgi Gairal meritariá d’èsser mai conegut, difusat e legit que çò qu’es per ara. Son escritura es a l’encòp precisa e aisida. Pòt servir als que vòlon començar a legir en occitan. Pensi aquí, plan solide, als liceans e estudiants, mas tanben a totes que prenon de corses pels adultes. Un roman de Sèrgi Gairal es l’escasença mannada per metre lo pè a l’estriu. Per se lançar dins l’aventura de la descobèrta de la literatura occitana, i pòt pas aver melhor. E mai se me planhissi sovent, e amb rason, que n’i pas pro, que la cal desvolopar encara mai; pasmens la literatura nòstra es encara capabla de nos reservar qualquas bonas suspresas.
 
La liurason Atots 2013 n’es l’illustracion perfiècha. Nos ven d’ofrir tres pampalhetas de tres autors aurelhaires confirmats. Demest aquestas lo romanet Las Vacanças de Pascas de Sèrgi Gairal. Al rebat de çò que fasiá Gui Viala, lo roman de l’autor braçacòl es tanben cortet. Es una de las rasons per las qualas disiái pus naut qu’èran ideals per un novelari en lectura. Es, adoncas, un avantatge e una qualitat de mai suls pavats. Per çò que lo roman cort a las meteissas qualitats que los autres, mai aquesta.
 
Sèrgi Gairal nos conta la vida gaireben coma es. Es aisit de s’identificar als personatges que met en vida. Sas narracions clauson lo vocabulari del cadajorn, sens anar quèrre lo nas darrèr l’aurelha. E subretot sens anar quèrre lo particularisme terradorenc qu’apòrta res de mai a la modernitat de la lenga. Tornarmai, aquesta coma sas autras, es una òbra que pòt participar mediaticament a l’aquisicion de la lenga. E del còp, aquí-çai, pas besonh de traduccion cara a cara coma n’i a que pensan qu’aquò seriá pedagogic. Per èsser pedagogic dins l’aprendissatge d’una lenga qual porgir a l’aprendís de tèxtes literaris clars, nets e precises. Los de Sèrgi Gairal convenon fòrça plan.
 
La trama del roman es pas tarabiscotada del troneire de Dieu. Aquò empacha que se pòsca trapar dins Las vacanças de Pascas una segonda lectura. Lo roman se debana coma un conte. Las ficèlas d’engimbradura son las meteissas. Lo conte es d’ont mai agradiu que lo personatge central es una mainada. E coma sièm totes estats mainatges un moment donat, l’òbra interessarà los legeires de sèt a setanta ans, segon la formula consacrada. Se tracha de l’eternal aprendissatge de la vida. De la, qualques còps dolorosa, descobèrta de l’impermanéncia de l’enfança. De l’iat que i pòt aver entre lo monde somiat de l’enfança, qu’òm voldriá eternal, e las contingéncias vitalas dels adultes. An aquel jòc, fatalament es lo mainatge que carga. A pas encara totas sas defensas en plaça, alavetz es el que craca primièr. Mas a per el sa capacitat de s’adaptar a tota situacion novèla. Es la rason per la quala aquel libre es tanben un libre d’aventuras e d’esperança.
 
Subremontar lo drama per lo poder despassar, tala es l’escomesa de cada instant de vida; e pas sonque per çò que tòca a l’espècia umana. Pertot ont i a la vida, aquesta cèrca de longa de se perpetuar, de se perlongar. Tre que i a amputacion endacòm, tanlèu aprèp i a rebrolh. Es una règla divina pels unes, universala pels autres.
 
Aquel roman es tanben, forçadament, un roman psicologic. D’alhors vesi pas cossí poiriá èsser endacòm question de l’uman sens que i agèsse una reflexion psicologica per endarrèr. Vòli dire, en subliminal. Mas dins Las Vacanças de Pascas tot aquò se debana dins un rajòl regular. Sens marrit subresaut, l’anar de la narracion se desrotla sauadament. D’aquò, la lectura del libre de Sèrgi Gairal es plasenta en divessa. Lo legeire se chalarà de seguir la pichona eroïna dins son percors de madurason. Se delectarà de l’encadenament plan ritmat dels eveniments que venon bolar son percors, forçadament excepcional.
 
Per los qu’o an pas encara fach, los convidi a comandar aqueste libre al pus lèu, mas subretot lor aconselhi de lo legir (n’i a que crompan de libres e que los legisson pas). Per l’escasença pòdon tanben comandar totes los del meteis autor que son pareguts dins la colleccion Atots. Deurián trobar tota la bibliografia de Sèrgi Gairal sul sit Internet de l’Institut d’Estudis Occitans. Personalament ne torni demandar. Un libre atal, que se legís en una ora e mièja, balha un plaser inagotable; òc ben, ne torni demandar.
 
 
 
 
Sèrgi Viaule
 
 
 
 
_____
GAIRAL, Sèrgi. Las Vacanças de Pascas. Edicions de l’Institut d’Estudis Occitans. Colleccion Atots n° 195, 2013. 106 paginas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo Felibre de Roèrgue Espaliu
2.

Sergi Gairal a publicat un escach de libres bilengas a las edicions del Grelh Roergàs. S.Gairal es sòci del Conselh d'Administracion d'aquela escòla felibrenca fondada per E. Mouly e que publica la maja part dels autors de Roergue e dels departaments vesins. Los libres e lo catalòg de las publicacions se pòdon comendar al prèp de JY Fourrier 12120 Sta Julieta de Viaur

  • 2
  • 0
Pirolet
1.

Completament d'acòrdi amb lo Sèrgi: "Las vacanças de Pascas" es un bon roman amb totas las qualitats citadas. En mai d'aquò, ièu tanben legissi pas que de libres sens traduccion francesa perque crèsi que i deu aver un public normal per l'occitan e perque, quand conèissi pro la lenga, legir una pagina sus doas m'es desagradable. E efectivament, amb aquò nos perdèm qualques bons libres. M'es arribat de demandar als editors se, amb los mejans qu'avèm ara, costariá tant qu'aquò de far doas edicions, una bilingua e l'autra en occitan sonque. Après tot, la 2a seriá ja prèsta e amb mens de papièr.
E perqué pas, dins lo cas de Gairal, una edicion de las òbras complètas. O tòrni dire: amb los mejans actuals, los tèxtes son ja prèstes sus l'ordenador.

  • 3
  • 1

Escriu un comentari sus aqueste article