Bandièra01 1180x150: Comuna de Tolosa

Actualitats

Rugbi XIII: Hull FC-Dracs en pelhòfas

Lo pilar de l'ASCarcassona, Romaric Bemba, es plan content
Lo pilar de l'ASCarcassona, Romaric Bemba, es plan content
La partida de dissabte a Brutus foguèt un bon resumit de la sason dels Dracs. Jos una pluèja britanica, los Dracs dominèron mas tombèron tròp de paumas, l’arbitre s’i metèt (ensag acordat als Lops alara que Duport es secat sus l’accion: s’anullèt dins la sason d’ensags pels Catalans per plan mens qu’aquò; ensag refusat a Menzies que l’arbitre vei l’arrièr tocar dins son enbut e, per un còp, demanda pas l’ajuda vidèo); e a cinc minutas de la fin, Scott Dureau manca una penalitat als 20 mètres qu’auriá permés als Dracs amb una egalitat a 14 pertot d’acabar seisens e de reçaupre pel primièr torn de las pelhòfas. Mas non, es Warrington que ganhèt 14-12.
 
E foguèt la darrièra partida sus la pelena de Brutus amb lo malhòt dels Dracs sus l’esquina, de “l’aujòl” Steve Menzies e del capitani Casty, abans son despart en Austràlia (saludat pels pichons de l’escòla de XIII d’Ornasons).
 
Atal, los Dracs acaban setens e aniràn jogar divendres cò d’Hull FC alara que St Helens, venceires justament d’Hull FC 38-12, reçaupràn Hull KR dissabte. Per aquelas esquipas, lo venceire contunharà en barratge e lo perdent n’aurà acabat de la sason.
 
Rapelarem que los Dracs demòran sus una eliminacion per las Aglas de Mar en quart de Copa al mes de julh 13-24 a Brutus. En campionat, los Dracs perdèron en abril a Hull 28-8 e ganhèron en junh la partida retorn 30-4. Fauta d’aver capitat a jogar davant lo public catalan, los Dracs an promés de metre totas las fòrças dins la batèsta.
 
Dins lo naut del tablèu, Leeds se ganhèt la tresena plaça mercé a sa victòria a Wigan 20-6. Atal, lo primièr Huddersfield reçauprà Wigan dissabte e Warrington reçauprà Leeds tre dijòus. Los venceires dels rescontres seràn dirèctament en mièja finala e los perdents en barratge.
 
En NRL, èra tanben la darrièra jornada de la fasa de classament. Dins un dèrbi de tria, amb lo mai grand nombre d’espectators per una partida de la primièra fasa: mai de 60 000 espectators, los Pols de Sidney prenguèron la primièra plaça en batent los rivals Lapinons 24-12. Doncas, per dobrir las pelhòfas, segon lo meteis sistèma qu’en Superliga: los Pols reçaupràn Manly e los Lapinons los campions actuals de la Tempèsta de Melbourne. Dins lo bas del tablèu, Cronulla reçauprà lo North Queensland e Newcastle anirà afrontar Canterbury.
 
Aquesta fin de setmana, las esquipas d’Elèit contuhavan la preparacion en vista de l’entama del campionat: Lesinhan ganhèt lo Trofèu Aillères dissabte a Tolosa fàcia a Limós, Tolosa e los Broncos tolzans.
 
Los Dragonets l’emportèron cò dels vesins d’Elèit 2: Baó sus la marca de 28 a 20. Los jogaires de l’AS Carcassona, ont an signat los fraires Khattabi, èran en estagi comando amb los paracasudistas del 3n RPIMA per refortir la coesion del grop.
 
Un jogaire mancava a l’apèl: lo pilar Romaric Bemba, retengut en Austràlia, per n’acabar amb sos devers de vacanças sus una victòria en finala del campionat del grop 10 de la Country Rugby League amb los Orange CYMS.
 
Las esquipas d’Elèit 2 auràn dreit a una dimenjada magica los 28 e 29 de setembre a Montpelhièr. La competicion ramosarà dotze esquipas: uèit an ja conegut l’escalon superior (Albi, Carpentràs, Cavalhon, L’Escura, Lion, Montpelhièr, Sant Gaudenç, Vilafranca de Roergue) e las 4 autras representan fièus tretzistas: Baó, Realmont, Tonencs, Tolosa Broncos.
 
Originalitat dels Diables Roges de Montpelhièr: Audrey Zitter serà la primièra femna a aver en carga una esquipa d’Elèit de XIII. Se li pòt faire fisança: son òme es l’alièr internacional Frederic Zitter e es la sòrre d’un autre alièr internacional, Olivièr Janzac. De mai, foguèt una capdavantièra dins la practica del XIII al feminin.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Las retarsmissions dels eliminatòris en dirècte sus BeinSport e Sky :
http://www.sportchoc.tv/topics/Super%20League

  • 1
  • 0

Escriu un comentari sus aqueste article