Bandièra01 1180x150: Comuna de Tolosa

Actualitats

Rugbi XIII: los Dracs se negan a Hull

La sason tira a sa fin en Superliga e en NRL, alara que las esquipas d’Elèit tornan prene lo camin dels estadis per la primièra dimenjada de campionat.
 
Sason acabada pels Dracs amb una partida que perdèron de fait l’autre dissabte amb la desfaita fàcia a Warrington a Brutus. Atal, se trapèron divendres a la nuèit jos una pluejassa a Hull que rendiá malaisits lo contraròtle de la pauma-savoneta e las passas e qu’aviá daissat lo public a l’ostal (mens de 5 000 espectators). Lo menaire de jòc, Scott Dureau, nafrat, èra pas sus la pelena-piscina. L’auratge èra tan bèl que los telespectators foguèron privats de la partida long del primièr quart d’ora per una pana de l’autocar-regida. Los catalans tanben èran en pana: mancavan pas de volontat, mas del còp de ren o de la pichona idèa lumenosa e decisiva. Un còp de mai, los temps de dominacion se concretizèron pas per un ensag, un ensag que venguèt pas jamai. Bòsc dobriguèt la marca sus penalitat. Mas al moment de tornar al vestiari, una candela de Pryce atudèt lo vam catalan: l’arrièr d’Hull FC, Shaul, recuperèt la pauma, foguèt arrestat mas non mes al sòl e doncas se relevèt coma un fosilh e a córrer un 80 mètres aqüatic a la barba de Dracs espantats: 6-2 per Hull a la pausa. A la represa, cada esquipa passèt una penalitat. Los Dracs trapèron pas de trauc dins la defensa catalana e a un quart d’oret de la fin, lo segonda linha Ellis arribèt a nautor d’un collèga-farfadet qu’èra a faire de ziga-zagas dins la defensa catalana petrificada: 14-4! La messa èra dita: ite missa est e la sason plegada. L’Steve Menzies acabèt pas sa longa carrièra sus un darrièr ensag que la vidèo li refusèt. Pels catalans seleccionats en blau per la Copa del Monde, va caler seriosament tornar cargar las batariás e trapar d’enveja d’aicí la fin d’octobre.
 
Las pelhòfas s’èran dobèrtas sus una suspresa: la victòria de Wigan cò del primièr del classament, los Gigants d’Huddersfield: 22-8. Warrington es l’autre qualificat dirècte per las mièjas finalas aprèp la victòria larga fàcia al campion Leeds: 40-20.
 
Dins la quatrena partida, St Helens coneguèt cap de dificultat per s’impausar fàcia a Hull KR: 46-10. En quart de finala, dijòus, Huddersfield reçauprà St Helens e divendres, Hull FC anirà a Leeds.
 
En NRL, en tota logica, Pols e Lapinons son dirèctament en mièja finala: victòria dels Pols 4-0 contra Manly, una partida ispra amb un sol ensag marcat tre la 9a minuta! Los Lapinons ganhèron 20-10 fàcia a Melbourne.
 
Dins las partidas eliminatòrias, se Newcastle anèt ganhar a Canterbury 22-6, la partida entre las Làmias de Cronulla e los Vaquièrs del Nòrd de la Tèrra de la Reina (Queensleand) mostrèt los riscs pels cardiacs d’assistir a de partidas de XIII en tornant afortir que la jòia es pròcha de la pena: las Dents de la Mar a costat son just un conte de ma grand la bòrnia! 79a minuta: las Làmias menan 20-18. Mesclanha dins los 20 mètres dels Vaquièrs. La pauma sortís pels Vaquièrs, lo centre trauca la defensa de Cronulla, dos tenguts apuèi, sus la còrna, l’alièr dels Vaquièrs punta l’ensag de la victòria. Braces levats d’un costat, desespèr de l’autre. Vidèo! L’alièr a mes lo tèrç d’un quart de sos sabatons sus la linha de tòca al moment de puntar: ensag refusat. La jòia e lo desespèr càmbian de costat! Una novèla mòstra del provèrbi “Una partida es pas jamai acabada abans lo còp de còrna” (e unes còps, aprèp!). Lo novèl torn qualificatiu metrà a las presas divendres Manly e Cronulla e dissabte Melbourne e Newcastle.
 
En Occitània e Catalonha, arriba l’ora de la represa del campionat d’Elèit.
 
Primièra fasa: una pola de uèit esquipas en Elèit 1 e doas polas de sièis en Elèit 2. Aqueste dissabte 21, Limós e Vilanòva dobriràn lo bal a 4 oras del vèspre a l’Estadi de l’Agulha. A 6h30, a Domèc, l’AS Carcassona reçauprà los Dragonetrs. Dimenge, al Molin, Lesinhan afrontarà Avinhon e Palau farà sos primièrs passes en Elèit 1 amb la recepcion de Tolosa. Òm se farà ja una idèa de las fòrças en preséncia.
 
E juntam a aqueste article una illustracion sonòra per totes los nostalgics.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article