Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaComtat VenaicinComtat Venaicin

Lo cònsol d’Aurenja a ensajat d’expulsar tornarmai, manu militari, l’elegida del Partit Occitan

| Orange Autrement
Lo 16 de setembre passat, la conselhièra municipala Anna-Maria Hautant, elegida pel Partit Occitan (PÒC) a la municipalitat d’Aurenja (Comtat Venaicin), patiguèt un autre assag d’expulsion manu militari del conselh municipal pr’amor qu’aviá mostrat son desacòrdi amb lo primièr cònsol Jacques Bompard, de la Liga del Sud, èx-Front Nacional (FN).
 
Pendent que se debatiá l’aprobacion de la carta dels ecoquartièrs, Hautant mostrèt son desacòrdi en argumentant sas intervencions. Lo primièr cònsol Bompard interrompèt la conselhièra occitanista, en considerant sas ironias coma una provocacion, e exigiguèt l’expulsion d’Hautant per contunhar lo conselh. Apelèt la polícia municipala.
 
Del temps que los policièrs arribavan, la tension se calmèt e los policièrs demorèron a la pòrta del conselh. Mas qualques minutas puèi, la tension montèt tornarmai amb una autra intervencion dissidenta d’Anna-Maria Hautant. Es alavetz que lo cònsol ultradrechan demandèt a la polícia d’expulsar l’elegida municipala.
 
Hautant se botgèt pas e se mostrèt ferma davant los tres policièrs que la venguèron expulsar. “Me toquetz pas”, lor diguèt. Los jornalistas presents, la desaprobacion del public que fasián de fòtos amb los telefòns mobils e la fermetat de la conselhièra faguèron recular los policièrs.
 
Es pas lo primièr còp qu’aquò se passa. Lo 21 de genièr de 2004, lo cònsol faguèt venir sièis policièrs qu’expulsèron per la fòrça l’elegida occitanista del conselh municipal.
 
Sabèm pas s’aquela actitud del cònsol, lo que voliá “faire de la vila d’Aurenja una veirina dei capacitats de gestion de l’FN”, se motiva pr’amor de son concèpte de la democracia, o pr’amor de la paur que s’escote publicament de vejaires dissidents.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maria Joana Verny Montpelhièr
11.

Anna Maria Hautant es qualqu'un de fòça coratjos. D'alhors, dins lo film "Mains brunes sur la ville", es entrevistada. Pensi que caldria organizar de'n pertot de projeccions d'aquel film, qu'es una meravilha d'intelligéncia e de precision documentària.

  • 4
  • 0
Terric Lausa Quilhan
10.

Vergonha!

E aquestes policièrs municipals que jògan a far la milícia personala d'aquel paucval de conse!

Ja los mots "Ligue du Sud" o dison tot.

E dire qu'aqueste eveniment segurament es la punta emergida de l'iceberg del comportament d'aqueste Bompard.

Anna-Maria Hautant deu èsser una persona plan coratjosa de far fàcia a aquesta violéncia.

  • 7
  • 0
Maria Joana Verny Montpelhièr
9.

A Pimflòid : creses que l'extrèma drecha se preocupa de drech ?
Jògan sus la complicitat tacita (o exprimida, ailàs, de mai en mai sovent) de bona part de l'opinion... Ailàs...
Per ne saupre mai sus aquela racalha, veire lo film "Mains brunes sur la ville" : http://www.youtube.com/watch?v=yiWrlQvzrTc

  • 7
  • 0
Gerard Joan Barceló Pèiralata
8.

#7 De res! ;) Mas es "Anna" en occitan, e "Jaume". Manca tanben la rectificacion sus l'afiliacion politica de Jaume Bompard : Liga del Sud. :)

  • 3
  • 0
Jornalet Occitània
7.

#6 Mercés plan! ;)

  • 2
  • 0

Escriu un comentari sus aqueste article