Bandièra01 1180x150: Comuna de Tolosa

Actualitats

Lo govèrn federal dels Estats Units es paralisat per manca de budget

Se comença d’aplicar lo primièr barrament indefinit de l’administracion centrala e dels servicis publics dempuèi 1995

Dempuèi dimars a mièjanuèch, l’Ostal Blanc a ordenat a las agéncias federalas dels Estats Units de suspendre lor activitat. S’agís del primièr barrament indefinit de l’administracion federala e dels servicis publics dempuèi 1995, en seguida de la revirada qu’an patit las convèrsas del Congrès per aprovar lo budget de l’an que ven. Alavetz, en abséncia de finançament, la lei prevei que las agéncias federalas comencen d’arturar l’activitat. La mesura afècta mai de uèch cents mila foncionaris considerats non essencials, sus dos milions en total, que dempuèi ièr lor cal pas anar al trabalh ni recebre cap de salari.
 
Pasmens, se prevei que i aja de servicis minims, qu’en qualques cases son al 5% dels efectius.
 
Son arribats a aquela situacion excepcionala après que lo Senat refusèsse dos còps de projèctes de lei de finanças elaborats per la Cambra dels Representants. Los dirigents republicans prepausèron diluns la possibilitat de votar un autre tèxt per prorrogar lo budget, mas aquò foguèt considerat inacceptable pels democratas. Cal dire qu’aquela propòsta implicava de suspendre la reforma del sistèma sanitari, que lo president Barack Obama la defend.
 
Segon l’Ostal Blanc, un barrament que s’alongue dins lo temps pòt comportar d’efièches fòrça negatius sus la classa mejana e las personas mai desafavoridas del país.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article