Bandièra01 1180x150: Comuna de Tolosa

Actualitats

Irlanda a decidit en referendum de manténer lo Senat

La cambra nauta se manten amb 51,7% dels vòtes, contra çò que disián los sondatges

Contra çò que pronosticavan los sondatges, los irlandeses an negligit la proposicion de suprimir lo Senat al referendum que se faguèt dissabte, amb 51,7% dels vòtes. Los sondatges prevesián una larga victòria dels partisans de suprimir la cambra nauta, mas pendent los darrièrs meses la proposicion del govèrn a perdut lo sosten popular. Aquel resultat se pòt interpretar coma un puniment de l’electorat envèrs las mesuras d’austeritat, qu’una d’elas èra la supression del Senat, venent de la coalicion governamentala del Fine Gael e dels laboristas.
 
Tant lo Fine Gael coma los laboristas considèran que lo Senat es una institucion innecessària e anciana. Disián que l’abolir permetriá d’estalviar vint milions d’èuros annals. Lo Sinn Féin èra tanben partisan de la dissolucion, del temps que los conservators del Fianna Fáil demandavan que se votèsse pas.
 
Lo Senat irlandés lo compausan seissanta membres: onze nomenats pel primièr ministre, sièis per de diplomats de l’Universitat Nacionala d’Irlanda e del Coláiste na Tríonóide (Trinity College) de Dublin, e los autes quaranta tres los elegisson los membres del parlament, los senators sortents e los conselhièrs.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article