Bandièra01 1180x150: Comuna de Tolosa

Actualitats

Un Monde XIII: quand los Tomahawks escalpan los Pols

Lo tombat que relança Carcassona

Los Tomanhawks gaujoses après la victòria suls Pols
Los Tomanhawks gaujoses après la victòria suls Pols
Mai de 3000 espectators s’èran ramosats divendres a l’Estadi dels Minims (Tolosa) per seguir lo rescontre de preparacion dels Blaus contra l’esquipa americana dels Tomahawks.
 
Lo rendètz-vos agèt res de véser amb la primièra confrontacion de 1954 ont lo XIII de França ganhèt contra una esquipa compausada de jogaires de... fotbòl american! Los Estats Units se presentavan amb unes jogaires d’NRL o Superliga, Mark Offerdahl que jogava a Carcassona l’an passat e de seleccionats venguts del XIII o del XV dels Estats Units. Lo galaup d’entraïnament anonciat se transformèt lèu en desillusion que lo vam, l’estrambòrd e lo plaser de jogar simple, eficaç e dinamic, e la volontat de faire circular la pauma de la formacion vesitaira prenguèron lèu lo pas sus una esquipa sens èime que multipliquèt las aproximacions, las pèrdas de pauma... Levat las accions que menèron als 4 ensags blaus (Vaccari a la 20a; Duport: 33a e 64a; Barthau: 39a), lo demai del temps los Blaus se mostrèron pas a la nautor de lor reputacion e del nivèl de jòc praticat pels Dracs ont quasi totes jògan o joguèron. Òm se pòt totjorn dire que se tractava d’una partida de preparacion e coma l’explicava un Blau: “Ara, sabèm que nos cal trabalhar la defensa”!
 
Tre dissabte, los Blaus prenguèron l’avion per Anglatèrra. L’entraïnaire, Richard Agar, dispausa d’una setmana per solidificar lo grop e averar la primièra partida, determinanta, dimenge, contra Papoa-Nòva Guinèa. Ara, es qu’en tres setmanas de recampament, dempuèi la debuta del mes, pòt balhar un sistèma mai eficaç e enlevat que las annadas jogadas amb los Dracs? Farem lo vòt que la responsa siague positiva...
 
Autra resulta espantanta dins los rescontres preparatius: aqueste dimenge, Anglatèrra pleguèt fàcia a… Itàlia, 15-14 (aprèp aver menat 14-12 a la pausa), sus un tombat a la darrièra minuta de Mantellano. Ray Nasso, lo talonaire d’Avinhon, passèt una penalitat pels transalpins que presentan 22 australians, un francés (lo centre de Lesinhan, Calegari) e un anglés d’origina italiana. Atal se parla d’una Squadra Austràlia...
 
Las tres autras esquipas del grop de França descobriguèron la qualitat de las pelenas anglesas: pas de problèma pels campions kiwis (Nòva Zelanda) contra la formacion de las Illas Cook: 50-0. Los Cavalièrs angleses (la formacion Espèr) agèron pas de pietat per Samoa: 52-16. Los Kumuls de Papoasia acabèron per faire plegar los Bravehearts d’Escòcia, 38-20, una victòria que lor i va balhar fisança abans l’afrontament contra los Pols de dimenge a Hull.
 
 
Lo tombat que relança Carcassona
 
Divendres, a Tolosa, foguèt una marrida suspresa pels Blaus que se faguèron escalpar pels Tomahawks, la formacion americana dels XIII: 22-18. Demòra una setmana per balhar un èime als Pols e afrontar Papoa-Nòva Guinèa.
 
Consequéncia de la Copa del Monde: las partidas Dragonets-Tolosa previstas aqueste dissabte 19 e Lesinhan-Dragonets de dimenge 27 son remesas, en rason del tròp grand nombre d’internacionals dins la formacion catalana. Las tres partidas d’aquesta prepausèron un debanament de copar l’alen.
 
Dissabte, Avinhon tornèt trapar sul fial los plasers de la victòria: 31-30 contra Vilanuèva. A Lesinhan, l’FCL vegèt la formacion catalana de Palau se lançar dins la remontada d’un retard de 18 punts, mas l’esquipa locala ne servèt 2 d’avança: 30-28.
 
Lo cap d’aficha de la jornada èra lo dèrbi entre Carcassona e Limós. Las tribunas de Domèc refofavan dels sostens de las doas formacions. E al cap de 20 minutas, los espectators carcassoneses tiravan lo morre: Gressèque aviá plan ensacat una penalitat, mas Limós aviá ja signat tres ensags: l’un de Bastian Almarcha (9a), lo segond de Matieu Almarcha (15a); e lo capitani Murcia (21a) amb doas grimaças aviá mes la defensa locala als abonats absents: 16-2 pels roge e negre al planchòt. Calguèt esperar la 33a e una longa passa sautada de Gressèque per son alièr Mazard que recentrava al pè per son centre Savage per que Carcassona dintrèsse al vestiari menada solament 16-8.
 
Tre la represa, Gressèque ensacava una segonda penalitat. A l’ora de jòc, Savage resistissiá al placatge de tres limosencs per puntar dins lo recanton, al pè del bandieret de tòca. Gressèque mandava la pauma de la transformacion entre los pals per l’egalizacion. Mas Peacok profeitava d’una esitacion de la defensa jauna e negra per quichar sus la pauma al limit de l’en-but. Transformacion de Murcia e novèl avantatge pels vesitaires: 22-16. 68a: lo talonaire local Joantan Som partissiá darrièr lo tengut als 15 mètres e s’engulhava coma una anguiala al bèl mièg de defensors petrificats per s’anar amorrar entre los pals. Transformacion de Gressèque: 22-22! A quatre minutas del tèrme, dels 40 mètres, lo dobertura jaune e negre evitava la carga d’un defensor limosenc e, d’un mèstre còp de pè (o: d’un còp de pè de mèstre?), mandava la pauma del tombat entre las barras: 23-22. Limós se’n voliá pas daissar contar mas, sus la darrièra accion, un darrièr enabans en cap de linha per bonificar un 2 contra 1 joslèva de jòia lo public carcassonés. L’ASC veniá de metre tèrme a l’invicibilitat de son melhor “enemic” e se relançar per la qualificacion per la Pola dels As de la segonda fasa.
 
Al programa de dissabte o dimenge (la Federacion se deu prononciar en debuta de setmana):Vilanuèva reçauprà Tolosa; Avinhon serà a Limós; Carcassona descobrirà l’estadi de Palau. Puèi, lo campionat marcarà una pausa fins a la dimenjada dels 16-17 de novembre. Los Dracs, ont los jogaires que son pas en Copa del Monde reprendràn l’entraïnament tre lo 12 de novembre, venon d’anonciar la signatura per doas sasons del ¾ australian de las Làmias de Cronulla: Ben Pomeroy, qu’a jogat mai de 160 partidas en NRL.
 
De senhalar que l’Ostal dels Joves de Carcassona presentarà a la comuna de la vila, del 28 d’octobre al 3 de novembre, una mòstra sus 50 ans de formacion dels joves al XIII: fotografias, documents, trofèus... Un DVD serà realizat per l’escasença.
 
 
 

Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article