Bandièra01 1180x150: Comuna de Tolosa

Actualitats

Amnestia Internacionala e Human Rights Watch contra los drònes

Acusan los Estats Units d’assassinats extrajudiciaris de civils e mai de “crimes de guèrra”

Amnestia Internacionala e Human Rights Watch exigisson als Estats Units d’explicacions suls atacs amb drònes, los avions de guèrra sens pilòt. I a pas cap de chifra d’aquela guèrra secreta, e es justament aquò que las doas organizacions umanitàrias demandan al govèrn estatsunidenc: que se faga una investigacion imparciala e que se publique lo nombre de civils mòrts.
 
Entitolat Serai Ieu lo Seguent? Atacs de Drònes Estatsunidencs en Paquistan, lo rapòrt d’Amnestia Internacionala considèra que qualques unes d’aqueles atacs se pòdon considerar coma de “crimes de guèrra”. “Lo secretisme qu’environa los programas amb de drònes dona als Estats Units la licéncia per tuar en defòra de la portada dels tribunals e dels estandards basics de la legislacion internacionala”, çò ditz Anmestia Internacionala, après estudiar 45 atacs debanats entre genièr de 2012 e agost de 2013 dins la region mai afectada de Paquistan.
 
“Es ora que los Estats Units sián transparents per rapòrt a lor programa e que menen los responsables de las violacions davant la justícia”, çò apond l’organizacion. Aqueles atacs aurián tuat almens 400 civils desarmats solament en Paquistan, segon los expèrts de l’ÒNU, e mai se Washington assegura qu’èran de “terroristas”. Amnestia Internacionala manten que “i a pas cap de justificacion per aquelas mòrts”.
 
Lo govèrn paquistanés oficialament s’opausa als atacs amb de drònes, mas Amnestia Internacionala denóncia que d’elegits e d’institucions d’aquel país aurián collaborat amb los Estats Units dins aquel domeni. L’organizacion umanitària denóncia tanben de responsabilitats d’elegits d’Austràlia, d’Alemanha e del Reialme Unit.
 
De son costat, Human Rights Watch a centrat son rapòrt sus Iemèn, e acusa atanben los Estats Units d’opacitat e d’assassinats extrajudiciaris.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article