Bandièra01 1180x150: Comuna de Tolosa

Actualitats

Un Monde XIII: dètz rasons de seguir la Copa del Monde dels XIII

En Occitània poirem seguir lo mai grand nombre de partidas mercé a Be-in-Sport
En Occitània poirem seguir lo mai grand nombre de partidas mercé a Be-in-Sport
Bon, lo melhor mejan de seguir la Copa del Monde, aquò’s d’anar veire de partidas: per çò qu’es de França-Nòva Zelanda del 1r de novembre a Avinhon e França-Samoa de l’11 de novembre a Perpinhan, de bilhetas son en venda sul sit de la Federacion ffr13.fr. Per las autras partidas, ne traparetz sul sit oficial de la Copa.
 
Una espròva coma la Copa del Monde de XIII s’amerita plan tanben una mediatizacion de primièra.
 
Per çò qu’es d’Occitània, poirem seguir lo mai grand nombre de partidas mercé a BeIN Sport Programmes, la cadena quatarita que dempuèi son espelida retransmet las partidas dels Dracs catalans, de Superliga, d’NRL e los rescontres del XIII de França.
 
En Anglatèrra, la BBC difusarà los rescontres de l’Esquipa de la Ròsa, un quart, las mièjas finalas e la finala. Tant qu’a i èsser, la BBC a obtengut los dreits de retransmisison pels Tornegs de las 4 Nacions de 2014 e 2016 e per l’edicion venenta de la Copa del Monde en 2017. De mai, presentarà de resumits de totes los rescontres que seràn retransmeses integralament per la cadena Premier Sport que difusa en Anglatèrra l’NRL e los Estats d’Origina.
 
TF1 profièita de la competicion per preveire unes reportatges sul rugbi de vilatge (virat a Vilanòva de Menerbés) e sus l’entraïnaira de Montpelhièr XIII. Podèm esperar qu’en Provença, Lengadòc e Rosselhon los jornalistas de France 3 seguiràn los rescontres d’Avinhon e de Perpinhan. Aprèp, es qu’i aurà un sol mot sus la competicion a Stade 2? Vos aconselhi de tibar l’aurelha... Benlèu un subjècte mai sus Sonny Bill Williams?
 
Per la premsa escrita, de segur L’Indépendant seguís quotidianament la competicion e avèm ja evocat lo quasèrn especial del Midòl d’aqueste diluns 21 d’octobre.
 
En occitan, avètz aquesta cronica quotidiana dins lo Jornalet, mai una cronica ràdio Sul Camin d’Old Trafford del diluns al dissabte sus Ràdio Lenga d’Òc Narbona e Ràdio Lenga d’Òc Erau.
 
Sus Internet, podètz consultar lo sit oficial de la competicion, lo sit de la Federacion o lo sit esportiu especializat Sportchoc.
 
E sus son sit internet, la BBC balha dètz bonas rasons de seguir la competicion:
 
1) Veire jogar Sonny Bill Williams.
 
2) Veire jogar los 3 fraires Burgess per Anglatèrra.
 
3) Veire jogar lo jogaire mai car: Sam Tomkins (Wigan) aprèp sa signatura als NZ Warriors.
 
4) Veire las 2 mièjas finalas amb una sola bilheta (lo dissabte 23 de novembre, a Wembley).
 
5) Veire un trofèu amb una brava istòria dempuèi 1954.
 
6) Prene part a una granda fèsta fijiana a Rochdale.
 
7) Es l’espòrt mai balès.
 
8) Lo XIII es l’espòrt que desfisèt lo faissisme.
 
9) Los australians son a priòri los mai fòrts.
 
10) ...mas se sap pas qual va ganhar l’espròva!
 
E s’anatz veire totes aqueles jogaires de tria, se cal plan dire que comencèron de jogar quand èran pichons dins las escòlas de rugbi. Atal, a Carcassona, del costat dels responsables de la seccion de XIII de l’Ostal dels Joves e de la Cultura, los responsables son plan contents e fièrs de veire Joan-Felip Baile e Miquèl Simon amb lo malhòt dels Pols sus l’esquina, eles que comencèron gafets a prene part a la formacion mesa sus pè pel club.
 
E la setmana que ven, de diluns 28 d’octobre a dimenge 3 de novembre, l’MJC-XIII  presenta una mòstra dedicada a sos 50 ans a la Comuna de Carcassona (cada jorn 10h-19h, levat diluns 14h-19h): fotografias, documents, trofèus... Un omenatge tanben a Loló Delon, lo president-fondador que 40 ans de temps menèt de dròlles a la practica del XIII al mai naut nivèl. Lo milierat de fotografias serà disponible sus un DVD-sovenir.
 
 
 
 
Alan Roch 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article