Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

Quatre mòrts en una fusilhada davant una escòla josieva de Tolosa



La polícia pensa al meteis tiraire que tuèt tres soldats la setmana passada

Almens un professor e tres escolans de 3, 6 e 10 ans son estats assassinats a la pòrta de l'escòla josieva Ozar Hatorah de Tolosa. Un adolescent de 17 ans es estat nafrat. Un òme amb un casco e dos pistolets a dobèrt lo fuòc sus l'escòla e se n'es anat amb una mòto. La polícia pensa que l'agressor pòt èsser lo meteis que tuèt tres militars la setmana passada a Tolosa e a Montalban.

 


Segon las primièras informacions, los pistolets emplegats uèi an de calibres coïncidents amb aqueles de las armas emplegadas contra lo soldat e los dos paracasudistas mòrts a Tolosa, l'11 de març, e a Montalban, lo 16 de març, respectivament. En aqueles cases, l'autor de la fusilhada fugiguèt tanben en mòto. Un autre paracasudista es a l'espital en estat fòrça grèu. 

L'atac s'es debanat uèi a 8h10 del matin, just al moment que se dobrissiá la pòrta de l'escòla. Un òme qu'amagava lo cap jos un casco de mòto a fusilhat los escolans e a fugit.

Lo Ministèri de l'Interior francés a anonciat lo refortiment de la vigilància dins totes los centres educatius josieus. Nicolas Sarkozy se n'es anat sus plaça e a parlat d'una tragèdia estatala. De nombroses comunicats de refús son arribats d'en pertot; entre eles, lo president de la region Martin Malvy parla de "dòl tragic" per l'"ensemble dels ciutadans" mentre que Joan-Francés Laffont, president de Convergéncia Occitana, ditz qu'"uèi totes sèm josieus" e qu'"Occitània es en dòl".

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article