Bandièra01 1180x150: Comuna de Tolosa

Actualitats

Un Monde XIII: ara, es ora!

Tòni Gigòt rescontrarà los samoans
Tòni Gigòt rescontrarà los samoans
Dissabte, a Limerick, los irlandeses resistiguèron tant coma poguèron fàcia als Cangorós, mas pichon a pichon la defensa verda pleguèt: desfaita 50-0 (9 ensags marcats pels Cangorós). Tròp freule lo treule per un cangoró! Austràlia rescontrarà los Estats Units en quart a Wrexham (dissabte 15, a 14h)
 
Dimenge de vèspre, dins una partida per l’onor, a Neath, las Illas Cook profeitèron de la defensa passadoira galesa per menar 16-4 e refortir l’avantatge tre la represa: 22-4. Los galeses tornèron dins la partida e remontèron fins a 22-20. Mas, a quauquas minutas del tèrme, una candelassa del dobertura tolzan Jonatan Ford èra pas contrarotlada per la rèiregarda roja, la bala i tornava per puntar entre los pals: 28-20. Lo darrièr ensag gallés cambiarà res a l’afar: 28-24 e una granda decepcion per la còlha de Cymru qu’a perduda las tres partidas de la competicion.
 
 
E Tònga eliminèt Itàlia
 
A Halifax, la darrièra partida de la pola C èra capitala per la designacion de l’oiten qualificat pels quarts: Itàlia deviá ganhar per panar la plaça a Escòcia. Mas, fàcia a Tònga, los italians se mostrèron mens vius e mens inventius que per la partida inaugurala o que la setmana passada. Cal dire que son los meteisses jogaires a una unitat prèp qu’an jogada ara 3 partidas (lo lesinhanés Calegari es pas jamai estat sus la fuèlha de partida). Se manquèt de gaire que lo primièr temps s’acabèsse sus un 0-0, amb degalhatge d’energia, fautas de mans e aproximacions de las doas còlhas, un arbitratge large sus la realizacion dels tenguts e un ensag foguèt refusat a la vidèo als Blaus transalpins e transcontinentals. Sus la còrna, lo dobertura tongan passava una penalitat. Lo segonda linha Willlie Manu puntava sus la linha, Langi transformava: 8-0 (46a). Los italians dominèron la darrièra mièja ora, se vegèron refusar un novèl ensag per la vidèo, s’expausèron al contra dels oceanians, feròces en defensa: ensag del mesclanha Foster (65a) aprèp una remontada de tot lo terren sus una pauma recuperada sus la linha. Meteissa accion e meteissa sancion a la darrièra minuta amb un ensag de Tarepo. 16-0 per Tònga fàcia a una Itàlia qu’a pas tengut la distància.
 
Serà doncas Escòcia que serà fàcia a la Nòva Zelanda (divendres 15, a 21h, a Headingley-Leeds)
 
 
Lo grand rendètz-vos de Perpinhan
 
Aqueste diluns 11, s’acabarà lo torn preliminar amb lo rescontre França-Samoa a 8 oras de la nuèit a l’Estadi Brutus de Perpinhan. Los Blaus auràn besonh de tota lor energia, mas tanben d’una brava part d’iniciativa e de presa de riscs, per ganhar la partida que lor i permetriá de considerar una partida jogabla contra Fiji en quart (dimenge 17, a 16h, a Warrington) puslèu que de prene Anglatèrra que monta en poissança (dissabte 16, a 21h, a Wigan).
 
Los Pols se presentaràn sens lo capitani Elima, pas encara remés d’una deslogadura acromioclaviculara. Serà lo Remi Casty que comandarà lo grop ont s’es fait rampèl a Antòni Maria e tanben (suspresa de l’entraïnaire) a Tòni Gigòt (que pòt jogar talonaire o mièg), que pren la plaça de Kane Bentley. Dins las explicas de las causidas faitas, se trapa a l’encòp la volontat de batre Samoa e la de presentar la melhora esquipa possibla pel quart. Unas subtilitats que seràn pas pel cap del public occitan e catalan quand las doas formacions dintraràn sus la pelena.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article