Bandièra01 1180x150: Comuna de Tolosa

Actualitats

Un Monde XIII: tròp d’espinas pels Pols

Aqueste divendres, los Còrs Braves d'Escòcia desfisaràn la Nòva Zelanda
Aqueste divendres, los Còrs Braves d'Escòcia desfisaràn la Nòva Zelanda
Tre dimars de matin, los Blaus sautèron dins l’avion direccion Anglatèrra e Wigan ont jogaràn dissabte de ser lor quart de finala contra Anglatèrra. De segur, es totjorn possible de comptar amb la gloriosa incertesa de l’espòrt, mas lo realisme buta a pensar que lo nom del mièg finalista relèva de l’evidéncia.
 
La partida contra Samoa a pas modificat las mancas vistas contra Papoa-Nòva Guinèa e la Nòva Zelanda: la valentesa servirà de res, tant que los Blaus auràn pas un patron-menaire de jòc. Barthau, dos còps assucat, poguèt pas téner lo ròtle, Gigòt deu faire sas pròvas e Tomàs Bòsc es un bon segond als Dracs per Scott Dureau, mas lo mesclanha australian jòga pas amb l’esquipa de França.
 
Darrièr, Clint Greenshields e Morgan Escarré sapièron alternar entre los dos pòstes d’arrièr e d’alièr e lo jove catalan es totjorn sorsa de dangièr per l’adversari, çò que l’es mens l’autre alièr Frederic Vaccari. Vincenç Duport foguèt jamai en posicion d’èsser lo bon caçaire d’ensag coma fa en Superliga. De mai, anèt tamponar son alièr sus un còp de pè a seguir que se seriá pogut concretizar en ensag. Joan-Felip Baile agèt pas contra Samoa lo socit de recuperar (e mancar) las passas al pè cirurgicalas dels Kiwis, mas s’aimariá de veire al centre un especialista del pòst coma Ionès Kattabi, assetat en tribuna dempuèi la debuta de la competicion. Davant, Pelissièr plaquèt, plaquèt e tornèt placar, ensagèt d’animar a l’entorn del tengut mas quand los Pols se trapèron en retard de punts, ensagèt unes còps de venir lo salvaire suprèm puslèu que de jogar collectiu. L’experimentat Raguin faguèt una deca bèla a quauquas minutas de la fin en repicant al centre e en daissant sos dos collègas isolats e desconsolats sus l’ala. Lo capitani d’un ser, Remi Casty, a degut mesurar çò que l’espèra en NRL e qu’aurà bravament de trabalh per s’impausar cò dels Roosters. Pels autres avants, se pòt pas metre en causa lor bona volontat e lor solidaritat, mas lor eficacitat magra en rason d’un jòc tròp estereotipat e previsible qu’es pas sorsa de dobte per la defensa advèrsa.
 
Bon, aquò dit, demòra una partida de jogar. Lo capitani Elima deuriá dintrar, coma Tèo Fages e Kane Bentley. Vint e tres ans que los franceses an pas batut los angleses, mas las marridas causas an totjorn una fin. Alara, perqué pas dissabte?
 
 
Rebombs de pauma
 
— Pas car pagat. Aprèp lo rescontre de Perpinhan, la comission de disciplina a suspendut dos jogaires samoans: per una partida Ah Maue e per una partida mai un avertiment Sauaso Sue. Seràn privats de quart de finalas se la suspension es pas levada divendres en apèl. Pas car pagat, quand se sap lo nombre de partidas de suspension dels Dracs en Superliga per unes gèstes mens dangeiroses.
 
— Pilar tongan. A Carcassona, se parla pas mai de la venguda d’un pilar papó, mas del pilar d’origina tongana Sione Kite, que portava la sason passada las colors dels Widnes Vikings en Superliga.
 
— Presentacion. Lo libre La Partida Clandestina serà a la venda jol tibanèl de l’estadi Domèc dimenge (abans e aprèp la partida AS Carcassona-FC Lesinhan).




Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article