Caumont de Durença (Comtat Venaicin) a prepausat a sos abitants un contracte de santat a bon prètz. Per aquò far, la comuna a utilizat lo meteis principi que los sits de crompas en grop per negociar las tarifas, e obténer aital de prèses preferencials. La Mutuala Generala d’Avinhon (MGA) a concebut un contracte de santat pels 4600 abitants e pels salariats de las entrepresas de la vila.
 
“Es un contracte ganhant-ganhant”, çò disiá a Le Figaro Véronique Debue, adjoncha delegada als afars socials, qu’a portat aquel projècte. Lo jornal francés n’explicava la simplicitat del principi: “de tarifas interessantas incitan los administrats a causir los contractes negociats per la comuna. La mutuala es, ela, assegudara de veire un aflux de novèls aderents”. “De mai en mai de gents se suenhan pas, per manca de mejans e de remborsament sufisents. Avèm, doncas, decidit d’agir per rendre lei suenhs accessibles a un pus grand nombre via un contracte de santat mens onerós e en prepausant de nombrós remborsaments”, çò i apondiá Debue.
 
De son costat, la directritz de la Mutuala d’Avinhon, Nathalie Meyer, soslinhava que “lo contracte prepausat a la comuna de Caumont de Durença es un contracte intergeneracionau: lei joves tant coma lei pus ancians cotizan totei 47 èuros per mes”. Meyer precisèt tanben que “dau mai i aurà de cotizants, dau mai i aurà de joves que permetràn de finançar lei suenhs dei pus vielhs”. Del temps que la mutuala compta 8000 aderents, lo contracte prepausat a la municipalitat a ja permés “de federar 240 aderents que cotizaràn cada mes, mai son pas 240 personas que seràn malautas a l’encòp”.
 
La comuna es contenta d’aquela iniciativa reüssida e pensa ja de renovelar l’experiéncia en d’autres domenis, coma los carburants, e prepausar de tarifas avantatjosas als administrats. Al delà, encoratjan las autras vilas d’o far perque “aquò còsta pas res a la comuna”.
 
Rue 89 n’a publicat un bèl reportatge.