Bandièra01 1180x150: Comuna de Tolosa

Actualitats

Los bonets roges bretons se son tornats mobilizar

Lo collectiu Viure, Decidir e Trabalhar en Bretanha convoquèt tornarmai los ciutadans bretons a una segonda mobilizacion per l’exempcion definitiva de l’ecotaxa —que lo govèrn francés aplica als veïculs de transpòrt de mèrças— e mai per la defensa del drech de poder viure e trabalhar al país. La protèsta, qu’aqueste còp se debanèt a Karaez, amassèt mai de 40 000 personas segon de donadas del jornal breton 7Seizh: aquò fa 10 000 personas de mai qu’en la manifestacion precedenta a Kemper que se debanèt lo 2 de novembre passat. Los manifestants portavan encara los bonets roges, en remembre de la revòlta antifiscala de 1675 dins lo país cèlta.
 
Segon lo collectiu, “l’abséncia de responsas concretas del govèrn francés als problèmas de Bretanha, après la manifestacion del 2 de novembre, e tanben la pauca credibilitat del Pache d’Avenir prepausat pel primièr ministre Jean-Marc Ayrault als bretons” los obligan de contunhar una mobilizacion, segondada pel bretonisme, e que pasmens a perdut en camin lo sosten dels sindicats. Los sindicats se son alonhats majoritàriament del movement dels bonets roges e convoquèron la setmana passada de manifestacions pròprias sens gaire de succès. An quitat pereu lo movement qualques plataformas, satisfachas per las proposicions financièras anonciadas pel govèrn francés e qu’avián paur d’anar delà la revendicacion economica.
 
L’amassada de dissabte a Karaez, definida per qualques mèdias coma un “manifestenal”, se debanèt de 12h30 a 20h amb d’intervencions de personalitats de la societat bretona, un passacarrièra festiu e de concèrts, e foguèt una reüssida de participacion.
 
Pel cònsol de Karaez, Christian Troadec, “la colomna vertebrala dels bonets roges es lo pòble breton”, çò diguèt dins son discors, dissabte passat. Troadec i afortissiá clar que “cal inventar un governatge regional novèl”.
 
De son costat, Thierry Merret, un representant del collectiu, avertissiá qu’aquela manifestacion seriá la darrièra abans un atac de colèra: “Karaez serà sens dobte lo darrièr acamp d’aquela mena”, çò diguèt.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tonin
2.

"Pel cònsol de Karaez, Christian Troadec, “la colomna vertebrala dels bonets roges es lo pòble breton”.

Bensai li aurà un jorn Gaudin, cònsol de Marselha, per dire "la colomna vertebrala dei neo cascavèus es lo pòble occitan" ?

  • 1
  • 0
Pèire Cardenal
1.

l'ecotaxe me ramenta la vinheta auto instaurada per lo socialista Ramadier per ajudar lei vièlhs o 'ai vielhs) aquesta ajuda tant lèu integrada dins lo buget de l'estat, aquela taxa suplementària, s'ei pas suprimida, serà lèu engolida dins una republica que, segons la formula-de Clemenceau, me sembla, samena d'imposts e recorda de fonccionaris

  • 0
  • 1

Escriu un comentari sus aqueste article