Bandièra01 1180x150: Comuna de Tolosa

Actualitats

Los caps de l'UE s'amassèron per tractar lo ròtle de las euroobligacions

França, Itàlia e la Comission sostenon qu'aquelas euroobligacions portarián l'estabilitat; Alemanha, Àustria, los Païses Basses e Espanha las vòlon pas

| Vilaweb

Los caps d'estat e de govèrn de l'UE s'amassèron ièr per tractar lo ròtle de las euroobligacions. França, Itàlia e la Comission sostenon qu'aquelas euroobligacions portarián l'estabilitat als païses de l'èuro; Alemanha, Àustria, los Païses Basses e Espanha las vòlon pas perque creson qu'aumentariá los sieus còstes de finançament. Ça que la, l'amassada foguèt pas mai qu'un sopar de trabalh sens gaire de decisions malgrat la crisi.


Lo president francés nòu, François Hollande, vòl completar l'acòrdi de relançament amb mai de mesuras. Lo novèl ministre francés de las Finanças, Pierre Moscovici, a confirmat qu'Hollande portarà l'emission conjoncha de deute al Conselh Europèu, malgrat l'oposicion d'Alemanha.

 

Mas Berlin se manten ferm e cambiarà pas son vejaire en junh, quand se debanarà lo Conselh Europèu ont caldrà fin finala prene las decisions. Lo numèro dos del Ministèri de las Finanças, Steffen Kampeter, diguèt que la creacion d’euroobligacions "donariá un signe erronèu de taus d'interès bas, e tirariá la pression sus las economias europèas perque s'ajustèsson". 
 


Al delà, Alemanha refusa de discutir l'usatge dels fonzes de salvament per balhar de capital dirèctament a las bancas qu'an de problèmas, sens besonh d'impausar de reduccions budgetàrias als estats, çò qu'es a l'ora d'ara pas permés segon la legislacion de l'UE. Berlin pensa que cal pas parlar d'un laxisme budgetari. 

 

De son costat, lo president del govèrn espanhòl, Mariano Rajoy, diguèt que lo debat es necite, perque cal veire "quin tipe d'euroobligacions" se meton en marcha. Segon lo sieu vejaire, es mai urgent de garentir l'estabilitat financièra amb l'intervencion de la Banca Centrala Europèa (BCE). 
 
L'amassada se celebrèt amb la paur que Grècia pòsca sortir de l'èuro. Lo 17 de junh poirián ganhar las eleccions los partits que refusan lo plan d'ajustament pactat amb l'UE. Los caps europèus afirman que vòlon qu'Atenas demòre dins l'èuro, mas solament s'accèpta de contunhar en fasent de reduccions budgetàrias. 
 


Al delà, i a los problèmas de la banca espanhòla e del desòrdre comptable de qualques comunitats autonòmas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article