Actualitats
Venèt sus la dralha de l'independéncia
An presentadas 20 000 signaturas per la convocacion d'un referendum d'independéncia en Venèt
Segon un partit secessionista los sondatges indican que lo sosten a la secession es majoritari. Lo president de Venèt admet qu'aquò es vertat, mas qu'ara i a pas las condicions legalas per poder materializar l'independéncia.
Solament doas setmanas après qu'un movement sard presentèsse 13 000 signaturas perque en Sardenha se debanèsse un referendum d'independéncia, agís l'independentisme venèt. Lo partit Indipendenza Veneta (independéncia venèta) liurèt dimars passat 20 000 signaturas al president de Venèt, Luca Zaia, perque convòque un referendum de secession que retòrne l'estatut sobiran a la Serenissima Republica. Venècia perdèt l'independéncia en 1797, quand foguèt ocupada per Napoleon.
Los promotors de la campanha d'amassada de signaturas dison qu'un sondatge recent afirma que 53% dels ciutadans de Venèt votarián per la secession. L'acte de liurament de las signaturas, çò ditz la formacion politica, "a una valor istorica" pel movement independentista.
Luca Zaia: es pas lo moment
Qué ne pensa de tot aquò Luca Zaia? Lo president de Venèt es un dels caps destacats de la Liga Veneta, un dels partits fondators de la Lega Nòrd, que teoricament trabalha per l'independéncia dels territòris del nòrd d'Itàlia en una republica federala padana. "Lo sicut de l'independéncia es interessant e aquò nos tòca", diguèt fa dos meses en una entrevista a Antenna 3 Nord Est, e apondèt: "53% [per rapòrt al resultat del sondatge mencionat abans] me sembla pauc. Cresi que [los venèts que vòlon la secession] son fòrça mai".
Ça que la, Zaia es pas dispausat a dirigir lo camin de cap a la secession per miei d'un referendum. "Podèm tecnicament amassar las signaturas", çò diguèt, "mas avèm pas un sosten juridic" de la part d'Itàlia. Quand lo jornalista li demandèt se podiá far un referendum consultatiu, Zaia respondèt que valiá pas la pena de far la votacion solament per saber l'opinion de las gents, e que, dins lo cas de lo convocar qualque jorn, se deuriá far dins las condicions realas de materializar l'independéncia se lo mond o causián aital.
Lo venetisme, fòrt a las eleccions
Dins las eleccions venètas de 2010, la Liga Veneta-Lega Nord foguèt lo partit mai votat, amb 35,2% dels vòtes. D'autras listas venetistas, divididas entre divèrsas candidaturas, comptèron amassa 2,4% dels vòtes. Entre los partits d'encastre estatal italian, la fòrça mai votada foguèt Popolo della Libertà (que se presentava en aliança amb la Lega Nord), amb 24,7% seguida del Partito Democratico, que demorèt a 20,3%.
Aqueste article ven del jornal catalan Nationalia.cat, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Sensa contar l'òdi vers las personas de lo sud d'Italia!
Chal dir en pau de causas denant:
1) la "Padania" existis pas, es un'idea facha a taulin da carque personas. En efect tot lo nord d'Italia as pas una lenga comuna, coma pol esser per la frança dau sud l'occitan, ma as tanta lengatge ben deferent: da aquelhe gallo-romanzi (Piemonteis, Lombard, Ligur, ecc..) a las minornaça lenguistica que son ren gallo-romanzo (occitan- franco-provençal, ladin, ecc..). Aquò es emportant per aribar a capir.
2) lo partit que port anant aquestas causas es la Lega Nord, un partit racista e xenofob, contra tot ço qu'es deferent.
Apres aquò que ai dich chasq'un pol arribar a son conclusion.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari