Lo Departament de la Cultura de la Generalitat de Catalonha ven d'anonciar la signatura d'un acòrdi de collaboracion amb la Comuna de Rodés (Leveson-Rodanés). La vila roergata es coneguda per èsser la sedença annala de l'Estivada de Rodés, lo Festenal Interregional de las Culturas d'òc. Aquel acòrdi permetrà de collaborar amassa als eveniments, manifestacions culturalas e quina autra activitat que siá restacada al desvolopament de la lenga occitana, en Catalonha o en Occitània.

 

La directritz generala de la Politica Lingüistica de la Generalitat de Catalonha, Yvonne Griley, avalora l'importància d'aquela nòva collaboracion: “La lenga occitana fa partida del ric patrimòni cultural e lingüistic partejat per Rodés e Catalonha, es per aquò que dempuèi lo Govèrn trabalham amb Rodés, e tanben amb d'autras vilas occitanas, per establir un encastre permanent de cooperacion culturala interregional e transfrontalièra.” 

 

Lo primièr dels escambis amb la capitala de Roergue se debanarà pendent l'Estivada. Los 23 e 24 de julhet, Rodés aculhirà la V Mòstra de Cinèma Occitan "Llanterna Digital".

 

Aquela mòstra de cinèma es una iniciativa del govèrn catalan que nasquèt a Lhèida (Païses Catalans) en 2008 dels prèmis de cortmetratges que pòrtan lo nom "Llanterna Digital", e visa de venir una fenèstra que balhe una vision panoramica de la lenga e de la cultura occitanas, per mejan de las creacions audiovisualas.

 

La mòstra 2012 s’inaugurarà lo 12 de junh a Lhèida, e d'ailà virarà per maitas vilas catalanas e occitanas, dont Rodés, en tot passar tanplan per Vielha o per Tolosa. Acabarà a Barcelona en novembre de 2012. 

 

L’edicion d’ongan prepausa 13 produccions dins una programacion variada, tant per la procedéncia dels obratges coma pels genres, estils e tecnicas expressivas. De longmetratges que partejan l'ecran amb de cortmetratges, la ficcion amb los documentaris e l'umor amb la divulgacion etnografica. Quant a la lenga, la mòstra es tanplan una veirina de las varietats de l'occitan.