De milièrs de malhorquins manifestèron diluns passat de ser a Palma de Malhòrca jol lèma “los Païses Catalans decidissèm: autodeterminacion”. La marcha se debanèt en escasença del jorn de Malhòrca, qu’es de fach lo 31 de decembre.
 
Fa mai de 20 ans que los malhorquins manifèstan cada fin d’annada pels dreches nacionals dels Païses Catalans, per lor lenga, cultura, territòri e drech a l’autodeterminacion, coma o remembra la plataforma 31D, qu’amassa las associacions e los partits politics qu’organizèron aquela manifestacion.
 
Ongan, lo jorn de Malhòrca èra marcat pels atacs del govèrn autonomic del Partit Popular contra la lenga e la cultura catalanas, mejançant un decret de las lengas que minimaliza lo catalan dins las escòlas, e per una lei dels simbòls qu’enebís d’exibir lo drapèl catalan dins las bastissas publicas. De mai, lo parlament de las Illas Balearas aprovèt fa qualques jorns una declaracion que nega l’existéncia dels Païses Catalans.
 
A totes aqueles atacs del govèrn espanholista de las illas, la societat civila lor a respondut amb fòrça, qu’ongan s’es mobilizada mai que jamai contra. Cal soslinhar las protèstas e la cauma dels ensenhaires, que luchan dempuèi qualques meses per arturar la nòva politica lingüistica de l’educacion. E capitèron ben la manifestacion mai nombrosa de l’istòria de l’illa, en defensa de l’escòla publica en catalan.
 
Es, doncas, dins aquel contèxt que l’independentisme catalan de Malhòrca s’amassèt diluns passat al centre vila de Palma.