Bandièra01 1180x150: Comuna de Tolosa

Actualitats

Catalonha e Espanha an començat d’ofensivas diplomaticas internacionalas

Lo president de Catalonha, Artur Mas, a mandat una letra als caps de govèrn europèus e un memorandum als ministres dels afars estrangièrs. De son costat, lo ministre espanhòl dels afars estrangièrs, José Manuel García Margallo, a fach virar un document de 210 paginas per endoctrinar las ambaissadas espanhòlas del Mond contra lo procès catalan.


Los govèrns catalan e espanhòl son plenament conscients que lo procès d’independéncia de Catalonha pòt ben o mal capitar segon l’implicacion, la pression e la reconeissença de la comunautat internacionala.
 

Document als ambaissadors espanhòls amb d’arguments contra l’independéncia de Catalonha

Lo govèrn espanhòl, e mai se repetís constantament que s’agís solament d’un afar intèrne de l’estat, fa pression, dempuèi qualques meses, sus los govèrns e ambaisadors per evitar de posicions favorablas a la causa catalana.

Segon çò que raportava El País, lo ministre espanhòl dels afars estrangièrs, José Manuel García Margallo, mandèt al mièg de decembre un document a las 192 ambaissadas e los 92 consolats qu’Espanha ten dins tot lo Mond. Aquel document expausa d’arguments que los diplomatas espanhòls los deuràn repetir en d’amassadas o dins de conferéncias de premsa, a prepaus del procès d’independéncia de Catalonha.

Lo rapòrt a 210 paginas e es mai que mai una lista de questions e responsas, amb un tèxt d’introduccion e sièis annèxes antiindependéncia segon los vejaires politic, juridic, cultural e economic. La tèsi fondamentala es que “lo separatisme es pas una opcion democratica e que trenca la convivéncia”.
 

Letra del president catalan als caps d’estat europèus e memorandum pels ministres dels afars estrangièrs

De son costat, lo govèrn catalan ven de publicar sa darrièra accion. Abans lo jorn de Nadal, lo president catalan, Artur Mas, mandèt una letra a totes los caps de govèrn europèus en explicant la volontat d’organizar un referendum, e mai lo pache entre los partits politics per causir una data e una question per aquela consulta. E demanda la collaboracion dels caps de govèrn per “impulsar aquel procès pacific, democratic, transparent e europèu”.

Artur Mas soslinha que la majoritat que sosten aquel referendum sus l’independéncia pel 9 de novembre rassembla lo 65% del Parlament de Catalonha. E tanben, met l’accent que s’agís d’una “demanda del pòble catalan”, exprimida en las eleccions del 25 de novembre, mas tanben en divèrsas accions popularas, coma la Via Catalana e la manifestacion de l’11 de setembre de 2012.

Al delà, la Generalitat a elaborat un memorandum sus la defensa del drech de decidir, mandat als responsables dels afars estrangièrs de 45 païses del Mond. Lo rapòrt compren una explicacion sul sosten politic e popular a la consulta, e lo sosten dels politicians a la votz de la carrièra, exprimida en la Via Catalana e en d’autras manifestacions.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhabèrt de Castre Montsegur
7.

#4 Ai pas jamai pensat que los liberals catalans èran d'àngels. Son liberals, tant coma los de las Americas o coma los d'Anglatèrra, del CAC 40 o qué te sabi mai.Çò que criticavi èra pas un pòble, espanhòl o pas, mas una postura argumentativa espanholista en Catalonha. Pretendre que los Catalans devon anar sosmeses a un potentat que se vòl espanhòl de lenga castilhana es una presa de posicion (plan coneguda edins l'Exagòn) inegalitarista entre los pòbles. Cap pòble definit per sa lenga a pas la mendra vocacion a se sosmetre a cap autre. Aitant segurament coma cap membre de cap de "classa" a pas la vocacion a se sosmetre a cap membre de cap autra classa. Tant val dire, segur, que las classas fan pas partida de la natura umana. Los sosmession dels pòbles unes als autres tanpauc. De la meteissa faiçon, per la meteissa rason.

  • 4
  • 0
Ivan
6.

#4 T'enganas fòrça. La lucha del pòble catalan per son independéncia es, a l'ora d'ara, un movement transversal non pas de classa mas de pòble. es lo primièr còp qu'en Catalonha lo pòble es a marcar l'agenda dels politicians.

La patz entre los pòbles, e la lucha de las classas. Mas atencion, que lo movement de liberacion nacional de Catalonha deu pas èstre empachat per un pseudomarxisme enganós.

  • 7
  • 0
Pèire Cardenal Jr. Velai
5.

#4 «En brève tot aquesta analisi manca clarament de contingut de classa e donc qu'amena a ua pensada dangeròsa que ne pòt que deservir lo combat noste.»

Se vos plai, aprenètz un pauc la pensada marxista abans de criticar los autres. Vòstre paraulís es caricatural e a pas de rapòrt amb lo marxisme vertadèir.

  • 6
  • 0
societat de classa revolucion e libertat
4.

#2
N'i a pas de pòple espanhòu que oprima los autes pòples de la peninsula. Qu'ei l'estat espanhòu qu'ei plan diferent. Istoricament l'estat espanhòu qu'ei l'estat de la classa dominanta de Castilha. Qu'ei la medish causa que de diser que los francés qu'opriman los occitans ou autes; Qu'ei la borgèsia francesa e la soa maquina ideologica e militar (l'estat francés) que'ns oprima. De la mèsma façon los andalos poden diser que los catalans que son los opressors seus. Alavetz que la vertat qu'ei plan la classa dominanta catalana dab lo Mas, entre autes, qu'a bastit la soa riqueça sus l'exploitacion de la pobreza deu pòple andalos (e plan segur deu proletaria catalan, entre autes) tot aquò que s'enseguit de l'annexion castilhana de El Andalos...En brève tot aquesta analisi manca clarament de contingut de classa e donc qu'amena a ua pensada dangeròsa que ne pòt que deservir lo combat noste.

  • 0
  • 9
Pèire Cardenal Jr. Velai
3.

Artur Mas e lo movement catalan jògan fin, pòdon ganhar. Lor chal ganhar.

  • 11
  • 0

Escriu un comentari sus aqueste article