Bandièra01 1180x150: Comuna de Tolosa

Actualitats

Privat d’Internet, un capmàs de Lemosin es en cauma dels impòstes

Bussin, un capmàs de 30 abitants de la comuna de Santa Anna-Sant Priech (Montanha Lemosina), es a far una cauma dels impòstes. Sos estatjants poiràn pas legir aquesta nòva dins Jornalet e mai se reclaman dempuèi d’annadas l’accès a Internet. Quitament pas lo telefòn mobil arriba dins tot lo vilatge.
 
“Sèm considerats coma daus ciutadans de segonda zòna, desmembrats de tots. Per contra, quand s’agís de reclamar daus impòsts, quí, òm nos desmembra pas”, çò planh un abitant dins un reportatge de France 3. Es per aquò qu’an decidit de far una cauma dels impòstes.
 
Dins fòrça territòris rurals, las linhas telefonicas son pas elegiblas a l’ADSL e France Télécom i investís pas. A la fin de 2003 se creèt lo sindicat mixte Dorsal, una estructura publica encargada d’installar l’accès a Internet dins las zònas ont arriba pas, per mejan de la tecnologia dicha WiMax. Mas quitament pas aquò arriba a Bussin.
 
Dorsal se resigna. “Avèm malaürosament dins la region de las zònas coma aquelas ont, efectivament, podèm pas res far. Quò es pas agradable d’entendre, mas ramente qu’avèm nòstres limits tecnics e financiers pròpris.”, çò diguèt a Le Populaire lo director del servici, Yan Pamboutzoglou. Sul sit de Dorsal se pòt legir que “99% de la populacion aurà accès aus servicis de naut debit quand lo ret serà achabat”, “donc Bussin deu far partida de l’1% restant”, çò denóncia Le Populaire.
 
Rue89 explica que fa ja sièis ans que los estatjants de Bussin escrivon de corrièrs als elegits, que signan de peticions, que reclaman lor drech a una connexion d’almens 2 megabits per segonda. E fin finala, per aqueste an 2014 an pres “la bona resolucion: la de paiar pas los impòsts”.
 
A qualques meses de las municipalas, fan de pression suls elegits locals per obténer almens un crèdit d’impòst e crompar una parabòla satellit. Seriá ben una solucion, marcha fòrça plan. Mas es mai car que l’ADSL e ofrís pas los servicis integrats d’Internet —television, mobil e telefòn fixe— que los operators telefonics prepausan a de prèses plan concurrrencials endacòm mai. 



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jiròni B. St Marçau - Limòtges
1.

Tròp sovent enquera, l'operators e França-Telecòm se tornen envoiar la bala de la responsabilitat. Conectar los vilauds quò vai, mas far los tabalhs sus las linhas deus pecans de "La provinça", fau pas exagerar...
Urosament, nos resta los segnaus de fumada.

Jiròni B.
lu-chapeu.jimdo.com

  • 0
  • 0

Escriu un comentari sus aqueste article