Bandièra01 1180x150: Comuna de Tolosa

Actualitats

Amassar de boitas per demandar que Coca-Cola etiquete en catalan

La Plataforma per la Lenga catalana farà a la fin de mai un grand mosaïc amb de boitas de Coca-Cola per ne revendicar l’etiquetatge en catalan

La Plataforma per la Lenga catalana a amassat mai de 3000 boitas de Coca-Cola per ne revendicar l’etiquetatge en catalan. La campanha nomenada #repteCocacola (enjòc Coca-Cola) comencèt lo 13 de decembre per commemorar lo vinten anniversari de l’organisme per la lenga catalana. Amb aquela iniciativa, cèrcan d’amassar 20 000 boitas per bastir lo 31 de mai que ven un grand mosaïc sus la Plaça de Catalonha, a Barcelona, amb lo lèma “Etiquetatz en catalan”. Aital vòlon far pression sus Coca-Cola e d’autras entrepresas qu’emplegan pas encara la lenga catalana en lors etiquetatges.
 
La Plataforma a previst de quilhar una seguida de ponches d’amassada de boitas e es a far de convencions amb d’associacions per que collabòren a la colleccion.
 
En 1993 se faguèt un acte similar amb 15 000 boitas, çò que foguèt la primièra accion de la Plataforma. Vint ans puèi, vòlon tornar far l’accion tant que Coca-Cola contunha d’emplegar pas lo catalan dins l’etiquetatge.
 
La Plataforma per la Lenga denóncia, al delà, que l’entrepresa complís pas la lei catalana de l’etiquetatge e remembra que la multinacionala respècta plan d’autras comunautats lingüisticas de las meteissas dimensions que la catalana.
 
L’actitud de Coca-Cola contrasta amb lo 94% de las entrepresas d’alimentacion qu’emplegan lo catalan. Es de soslinhar que la societat de bièrra Moritz etiqueta quitament en occitan las cervesas distribuidas en la Val d’Aran.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Yellow dtz
8.

Encara mai simple, boycottar tot ce qu'es capitalista.
Arrestar de fumar lo tabac d'Imperial Tobaccos, quitar de cargar de vestits, quitar tanben lei medicaments, lo telefòne, internet e lo resta.

Benvenguda dins lo segle XXI bravei gents.

  • 0
  • 1
Mathias Gibert vilamanda
7.

E perqué pas un Cocatalà (o un Cocatalunya)? (Avèm un "Colà occitan"a Montpelhièr qu'es plan simpatic!)

  • 0
  • 0
Mr Realista
6.

La luta contra l'imperialisme espanhòl se ganharà qu'en s'aligant ambe las fòrças de l'economia mondiala.
Uèi son las entrepresas coma Coca Cola que fan la reconeissença internacionala d'una cultura e sa legitimitat a pretendre aver un Estat Independent.

  • 4
  • 1
Dídac
5.

Chau saupre çò qu'òm vòu: luitar contra lo sistèma, v-o i entrar. Que lo pus grand empèri economique capitalista parle catalan, io me'n fote, tot belament. Coma totjorn, eissubliem la luita de classas. Coma ditz la campanha de l'esquerra, "independéncia per tot chamjar". Sinon, un autre estat capitalista, e, pus neoliberal enquera que l'espanhòl?

  • 6
  • 0
c.
4.

Boicotar Coca-Cola, tot simple !
Coca Cola = chivau de Tròia de l'imperialisme deus Estats-Units.

  • 5
  • 0

Escriu un comentari sus aqueste article