Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

Lo suspècte dels assassinats de Tolosa e Montalban es mòrt

I a agut de còps de fuòc entre la polícia e Mohamed Merah, qu’èra demorat mai de trenta oras resclaus dins un apartament. La polícia li a tirat una bala dins lo cap. Tres policièrs son estats ferits, un es en estat grèu 



| Vilaweb

Tèxte legit

La polícia ven de confirmar que l'òme resclaus dins un apartament de Tolosa pendent mai de 30 oras es mòrt. A onze oras del matin, un grop de policièrs son intrats dins l'apartament ont Mohamed Merah s'èra embarrat dempuèi mai de 30 oras; i a agut de còps de fuòc e d'explosions pendent l'assaut; Merah s'èra refugiat als comuns en ofrissent de resisténcia amb una violéncia extrèma. La polícia li a tirat una bala dins lo cap quand voliá sautar per la finèstra. Tres policièrs son estats ferits, un d'eles es en estat grèu. Mohamed Merah confessèt èsser lo tuaire d'un professor e de tres escolans d'una escòla josieva de Tolosa, e mai de tres militars, la setmana passada e, segon lo parquet, aviá pensat d'assassinar un soldat, ièr, puèi dos policièrs, mai endavant. 


La polícia aviá pas recebut cap de senhal de vida de Mohamed Merah dempuèi ièr de ser e, pendent la matinada passada, avián causat d'explosions contarotladas per copar lo porgiment d'aiga, de gas e d’electricitat; e sustot, per lo minar psicologicament. Mas la manca de responsa pendent tant de temps aviá fach que las autoritats pensèsson que Merah èra pas viu. Alavetz l'assaut comencèt. 
 

Segon çò qu’a explicat lo ministre de l'Interior, Claude Guéant, la polícia es intrada per la pòrta e per las fenèstras de la bastissa, n'an inspectat las cambras e Merah es sortit dels comuns, ont s'èra amagat, en tirant "amb una violéncia extrèma". Après, segon Guéant, es sortit per una fenèstra, "armat amb un kalashnikov", e es estat en aquel moment que l'an tuat.
 

Ièr dins la matinada la polícia l'encerclèt, el diguèt que sortiriá de ser, mas o faguèt pas, e comencèt alavetz una negociacion interminabla. 
 
Pendent lo sètge, que comencèt ièr a tres oras del matin, i aguèt de còps de fuòc entre Merah e la polícia amb lo resultat de tres agents ferits. 

 
La polícia localizèt lo suspècte après aver arrestat lo sieu fraire, que donèt l'adreça d'un ostal a la carrièra del Sergent Vinge, dins lo quartièr Còsta Pavada de Tolosa. Una equipa d'elèit de la polícia i anèt vèrs tres oras del matin e ensagèt d'i intrar, mas foguèron aculhits amb de còps de fuòc. Alavetz la polícia ensagèt d'i negociar e li portèron quitament sa maire del quartièr del Miralh per que lo convenquèsse de sortir de l'ostal.
 
Lo suspècte fasiá temps qu'èra conegut de la polícia locala. El e lo sieu fraire èran meses en examen per la Direccion Centrala de l'Informacion Interiora (DCRI), perque i a d'indicis que s'èran formats dins una zòna d'Afganistan contrarotlada pels talibans e qu'èran demorats en Paquistan. D'un autre costat, la polícia crei qu'agissiá per venjar la preséncia de soldats franceses dins de païses musulmans.
 

Lo ministre de l'Interior francés, Claude Guéant, informèt ièr de matin que l'òme, de vint e quatre ans e apelat Mohamed Merah, lancèt un pistolet Colt 45 per la fenèstra per tal de l'escambiar amb un telefonet e per tal de manténer la comunicacion amb las autoritats. Mas i aviá mai d'armas dedins.
 


Podètz veire mai informacions en occitan sul Blòt de 3/24 en aranés 22/03/2012 de Television de Catalonha

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article