Bandièra01 1180x150: Comuna de Tolosa

Actualitats

L’occitan dins lo tramvai de Tolosa lèu-lèu?

| Maxime Raphaël
Sembla que los usatgièrs quotidians de la linha T1 del tramvai de la Ciutat Mondina pòscan lèu ausir l’anonci de las estacions en occitan e en francés. O prometon la màger part dels candidats al cap de la comuna de Tolosa après la reünion publica, organizada per Convergéncia Occitana, a la quala participèron de representants de las listas del consòl Pierre Cohen (PS), de Jean-Luc Moudenc (UMP), d’Antoine Maurice (EELV), de Jean-Pierre Plancade (centresquèrra) e de l’eurodeputada de centredrecha Christine de Veyrac. Cal totun remarcar que sonque la de Pierre Cohen presenta de candidats del movement occitanista Bastir.
 
La preséncia de la lenga occitana dins los transpòrts publics se refortirà, ja que despuèi 2009 lo mètro fa d’anoncis bilingües, malgrat una polemica començada dins lo malhum social Facebook, que menèt en 2011 a un cambiament de la votz occitana a la quala se reprochava, de biais fòrça agressiu de còps, lo volum sonòr. Après la difusion, a partir dels ans 1990, d’una senhaletica bilingüa sus las placas dels noms de las carrièras del centre vila, puèi a l’intrada de Tolosa, l’occitan aumenta pauc a cha pauc sa visibilitat en la vida publica.
 
Desirem que l’experiéncia tolosana s’espandisca dins d’autras vilas occitanas, coma dins lo tramvai de Montpelhièr o de Bordèu, o dins lo mètro e lo tramvai de Marselha. Pel tramvai de Montpelhièr, una peticion circula sus Internet despuèi lo mes d’octòbre de 2013.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Toloricon Tolosa
4.

#3 ''occitanizada'' plan segur!

  • 1
  • 0
Toloricon Tolosa
3.

#2 Per la bona rason qu'a Tolosa i a pas qu'una linha de tram (la dicha T1) e doas linhas de metro (A e B) que ja son ''occitalizadas''

  • 5
  • 0
BOURDON
2.

Mes perqué sonque la linha T1 ?

  • 1
  • 0
Ni francés ni italian, occitan niçard
1.

"s’espandisca dins d’autras vilas occitanas, coma dins lo tramvai de Montpelhièr o de Bordèu, o dins lo mètro e lo tramvai de Marselha" e lo tram de Niça !!!

  • 10
  • 0

Escriu un comentari sus aqueste article