Bandièra01 1180x150: Comuna de Tolosa

Actualitats

Fotbòl: Niça e Tolosa OK, Bordèu e Marselha KO

| The busy brain
Ièr dimenge, Montpelhièr afrontèt Lilla a l’exterior. Còntra lei nordistas que vòlon assegurar una qualificacion en Copa d’Euròpa, lei campions de França 2012 pesèron pas gaire dins aquela partida perduda logicament 2 a 0. Es la primiera desfacha dei montpelhierencs en 2014, qu’après la venguda de Rolland Courbis son bravament remontats au classament maugrat lo resultat de ièr.
 
Mai tard dins la serada, Bordèu aculhèt Lion per una partida fòrça importanta puei que lei dos clubs èran separats de solament 2 ponchs. Lo scenari foguèt a l’auçada de l’eveniment: Henri Saivet dobriguèt lei ponchs per lei girondins dins lei primierei minutas de la partida, e Bordèu s’encaminava tranquillament vèrs la victòria. Èra sens comptar amb Bédimo, lo laterau en forma de Lion qu’egalizèt dins lo temps addicionau. Doas minutas puei, lo jove Tolisso donèt lei 3 ponchs ai lionés. Una terribla còntraperformança per Bordèu, que demòra en 8a posicion au classament.
 
Lo comeback de la dimenjada es l’òbra de Tolosa, qu’èra menada sus sa pelosa 2 a 0 per l’Estadi de Rems. Pas descoratjats, lei tolosencs marquèron 3 gòls dins lo darrier quart d’ora per Aurier, Ben Basat e Ben Yedder en s’assegurant una segonda victòria aderren en campionat.
 
Divendre de ser, lei marselhés decebèron encara sei suportaires amb una nòva desfacha còntra la vesina, Niça. Lo sol gòl de la partida foguèt marcat per Valentin Eysseric, jogaire originari d’Ais de Provença. Fa cinc còps aqueste an que l’OM es batut au Velodròm en campionat. Amb 34 ponchs, lei niçards an quasiment assegurat lo manten en Liga 1. Per l’OM, lo pòdi esperat s’aluenha seriosament e la crisi poiriá tornar lèu.
 

Lo classament après la 28a jornada 
 
PlaçaEsquipasPonchs
1 París 67
2 Mónegue 59
3 Lilla 52
4 Sant Estève 48
5 Lion 45
6Marselha 43
7 Rems 42
8Bordèu 40
9Tolosa 39
10 Bastia 37
11 An Oriant 36
12Niça 34
13Montpelhièr 33
14 Gwengamp 32
15 Nantas 32
16 Roazhon 31
17 Èvian 30
18 Valencianas 25
19 Sochaux 22
20 Aiacciu 15


L’informacion de l’estrange
 
Lo grand Barça a bensai perdut la Liga aquesta dimenjada. Batuts per suspresa sus lo terren de Valhadolid, lei catalans laissan la primiera plaça au rivau de totjorn, lo Real Madrid, qu’a manjat lei valencians de Llevant 3 a 0. L’autre club de Madrid, l’Atlético, e mai passa davant Barcelona qu’es ara a 4 ponchs dau lidèr. 4 ponchs, es pas grand causa mai poiriá èstre sufisent per donar ai madridistas son 33n títol de campion d’Espanha. Lo dèrbi dau 23 de març a Santiago Bernabéu sarà decisiu.
 
 
 
 
Matieu Casanòva

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article