Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Val d’Aran: los salariats de Neoelectra protèstan

An recebut lo sosten popular, lo del Conselh General d’Aran, lo d’Unitat d’Aran e lo de la municipalitat de Les

A Les (Aran)
A Les (Aran)
Divendres passat a 19h, los abitants de Les (Val d’Aran) sostenguèron un acamp dels salariats de Neoelectra e de la piscifactoria de Les, qu’a causa de la lei de reforma energetica del govèrn d’Espanha, deurà barrar, e los 27 salariats riscan d’anar al caumatge.
 
La protèsta comencèt amb un acte de sosten de las autoritats municipalas de la vila. Al delà, lo govèrn d’Aran a ja manifestat son sosten. Dins aquel sens, lo sindic d’Aran, Carlos Barrera, non solament participèt a la protèsta mas ven d’anonciar sa preséncia en una reünion entre lo conselhièr de l’entrepresa e de l’emplec de la Generalitat de Catalonha amb lo director de Neoelectra. “Èm conscients qu’aguest barrament ei conseqüéncia d’ua decision deth Govèrn Centrau e dificilment se pòden preveir solucions concretes entà cada cas, mès tenguent en compde era oposicion det tot eth sector ad aguesta lei, dilhèu òc que i poderie auer ua reconsideracion des plantejaments ena quantia dera reduccion dera prima que harie possibla era viabilitat economica de Neolectra, en tot garentir atau es lòcs de trabalh.”
 
Aquela reforma energetica del govèrn espanhòl a eliminat las primas a la cogeneracion, es a dire: al procediment de profechar de l’energia termica venent de la produccion d’energia electrica. Sens aquela bonificacion, l’entrepresa ditz qu’es obligada de presentar un concors de creditors, çò qu’implica lo barrament de las installacions e la pèrda dels emplecs.
 
Neoelectra es un pargue industrial ecologic de tres entrepresas a Les, que se completan en la fornidura de matèrias primièras e l’eliminacion de residús. Neoelectra gerís la centrala de cogeneracion que produtz d’electricitat per mejan de la combustion de gas; aquò produtz d’aiga cauda que s’emplega per climatizar las piscinas dels esturions de la societat de caviar Nacarii. Aquò crèa lo CO2 que se met en botelha e que se vend per elaborar de bevendas gasosas.
 
 
Manifestacion a Lhèida
 
Ièr, dimenge, qualques centenats de personas marchèron per las carrièras de Lhèida (Catalonha) per defendre los païsans, l’emplec e los servicis publics. A la manifestacion, convocada per qualques sindicats, los salariats de Neoelectra, amb lo sosten d’Unitat d’Aran, menèron lors revendicacions en aquela protèsta.
 
Los manifestants cridèron contra “los mals govèrns de las retalhadas, de las politicas antisocialas que van contra los obrièrs e contra generar d’emplecs”. 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
1.

Entà jo, que barre ua entrepresa qui tua bèstias qu'ei tostemps ua bona novèla. Que soeti aus emplegats de Nacarii de trobar ua auta activitat (remunerada si n'an besonh) on haràn quauqu'arren d'utile.

  • 0
  • 3

Escriu un comentari sus aqueste article