Bandièra01 1180x150: Comuna de Tolosa

Actualitats

Estat francés e municipalas: victòria de la drecha e de l’extrèma drecha

| Rama
A l’ora qu’escrivèm aquestas linhas, coneissèm pas totes los resultats oficials, mas ja las tendéncias del segond torn de las eleccions municipalas francesas son tras que claras: l’esquèrra, mai que mai lo Partit Socialista, patís una dura desfacha, levat en qualques vilas, coma a París, o a Avinhon en Provença. 155 vilas de mai de 9 000 abitants passan a sos adversaris.
 
En Occitània, lo PS pèrd Tolosa, Valença e Lemòtges contra l’UMP, e tanben Pau contra François Bayrou, lo centrista que foguèt tres còps candidat a l’eleccion presidenciala. Pau èra socialista despuèi 40 ans e Lemòtges votava per l’esquèrra despuèi 1912, çò que baila una idèa significativa del tèrratrem politic. A Montpelhièr, lo candidat dissident d’esquèrra Philippe Saurel pren la comuna al PS. A travèrs de las eleccions municipalas, es doncas la politica del govèrn socialista que sembla d’èsser estada castigada.
 
La segonda tendéncia fòrta de las eleccions es la pojada espectaclosa de l’extrèma drecha (FN) en Occitània, e particularament en Lengadòc e Provença. A Besièrs, la lista del jornalista Robert Ménard, sostenguda per l’FN, es victoriosa, e lo meteis partit obten Frejús, Bèucaire, Cogolin, Lo Luc e Lo Pontet, mentre que lo seten sector de Marselha tendrà un cònsol FN. Tanben cal notar la reeleccion de la consolessa Marie-Claude Bompard a Bolena, del partit d’extrèma drecha la Liga del Sud, coma son marit Jacques Bompard, cònsol d’Aurenja reelegit tre lo primièr torn lo 23 de març. Es evident qu’aquesta implantacion fòrta de l’extrèma drecha francesa dins una part importanta d’Occitània implicarà de questionaments per l’occitanisme. Caldrà veire quant de candidats Bastir son ara conselhièrs municipals e cossí s’organizaràn.
 
Enfin, remarquem en Corsega la victòria istorica del candidat nacionalista Gilles Simeoni a Bastia, capitala economica de l’illa. Son adversari, Jean Zuccarelli, filh de l’ancian cònsol Émile Zucarelli, eissit coma el de l’esquèrra jacobina, l’aviá comparat a un terrorista e a un partisan de Mussolini, mas aquò aurà pas sufit per espaventar los electors.
 
 
 
 
 
Gerard-Joan Barceló
 
 
 
 

fffff  fffff
 Solament un elegit de Bastir a l’Isla de Baish
 
A las municipalas, en L’Isla de Baish (Savés), la lista Agir Ensemble menada per Francis Idrac (PS e aligats) ganha dab 53,46%. La lista Bastir dita Alternativa L’Isla de Baish, menada per Jean-LucDavezac e sostenguda peu Partit de la Nacion Occitana (PNO), avèva causit de se mesclar entau segon torn dab la lista L’Isle du Futur menada per Jean-Hubert Rougé, qu’es batuda dab 46,31%.
 
Atau, n’i a pas fin finala qu’un sol elegit Bastir sus aquesta lista, Mélanie Bourgeois (numèro 6), que representa tanben les dus movements ecologistas Rassemblement Éco-Citoyen 32 e CAP 21.
 
Rapòrt au prumèr torn, la lista Idrac progrèssa de 274 vòtes. Mentre que la lista Rougé progrèssa de 304 vòtes. I a pas que 30 vòtes ganhats per la lista Rougé, quitament de la fusion Alternativa L’Isla de Baish qu’avoc pr’aquò 436 votzes “en resèrva” deu prumèr torn. Dab ua participacion a pena mès importanta au segond torn (un centenat de vòtes), non podèm explicar la mobilizacion entà l’esquèrra que per un repòrt d’ua brava part de la lista Alternativa sus aquesta lista, quitament de la fusion nòsta dab la lista advèrsa... Dab las consequéncias que l’òm sap: i avèva 5 elegits Bastir possibles, n’auram fin finala pas qu’un! Atau qu’ei.
 
 
 
 
Jeròni Picas
 
     

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pauròt Engolesma
11.

#10 E si, per cas, s'i escason...

  • 0
  • 0
Antòni Benlèu Moissac
10.

Soi pas gaire inquietat. Nos caliá que lo FN governèsse per qu'òm pòsca remarcar qu'eles son pas cap de solucion mas que fan partida del problèma. Veirem-ben a las eleccions venentas los resultats del FN

  • 4
  • 0
Castel Mathieu Marselha
9.

E per tornar au subjècte, òc, aquestei resultas fan frenir l'esquina per quau a un pauc d'èime occitanista... Pas que l'occitanisme deu necessariament èstre d'esquèrra, pasmens, ben mai que la victòria de la drecha e l'avançada, encara mai simbolica, de l'extrema drecha, es lo triomfle dau jacobinisme lo mai absolut.

Sembla luench lo temps dau Var rotge de 1851 :/

  • 7
  • 0
Castel Mathieu Marselha
7.

#6 (question totalament fòra subjècte tè : Coma se fa que la vilòta aquesta que s'anomena "Camaret sur Aigues" en francés deven "Camaret d'Egue" en occitan ? Son li ven pas dau riu "Aigas", ortografiat de plusiors biais en francés, notadament Aigues, Aygues, Eygues, etc (amb aquesta -y- que transciu aproximativament la prononciacion en occitan) ?
https://fr.wikipedia.org/wiki/Aygues

Meti l'article en francés que l'a pas de pagina en occitan sus aqueu riu).

  • 4
  • 0

Escriu un comentari sus aqueste article