Divendres, los Dracs catalans comencèron a fum lor partida sus la pelena de l’estadi novèl de Salford per menar 20 a res al cap de 25 minutas, mas d’un còp tot se desmarguèt: encaissèron dos ensags abans la pausa e tres de mai dins lo primièr quart d’ora del segond temps per èsser menats 28-20.

 

E se los sang e aur tornavan trapar los camins de l’ensag per dos còps, un ensag suplementari dels Roges balhèt la victòria als locals 34-30. Aquò marca un brave còp d’arrèst dins la sason catalana, d’autant mai que punta la partida de galà delocalizada dins l‘estadi de la Mosson a Montpelhièr.

 

Aqueste dissabte 9 de junh, a 3 oras del vèspre, los Dracs i afrontaràn Wigan qu’es per l’ora lo cap-de-fila de la Super-Liga e que ven de passar un 50 a 8 als Rinoceròs de Leeds, e a Leeds sioplèt! Per aquela primièra partida que serà retrasmesa en dirècte suls ecrans d’AL-Jazeera (BeinSport 1), l’escomesa pels Dracs es d’emplenar l’estadi: tren a 1 euro al despart de Perpinhan, carris de las còlhas de sosten coma a Esperasan o dins lo Lauquet, dintrada a gratis per totes los licenciats de la Federacion e pels abonats del fotbòl de Montpelhièr,…

 

Dins la dimenjada, las quatre partidas programadas entre las equipas d’Elita e las 4 melhoras de League One virèron a l’avantage de las equipas anglesas. Vertat que nòstras formacions èran un pauc demobilizadas aprèp la fin del campionat. A Domèc, l’AS Carcassona presentava una formacion ont figuravan plan de juniòrs fàcia a las Aglas de Sheffield que prenguèron per pròia gostosa nòstres braves Canaris.

 

Cada deca, cada esitacion se paguèt per un ensag e la partida s’acabèt sus un 40-12. Lo Tolosa Olimpic pleguèt fàcia a Halifax 56-28, Avinhon tornèt de Leigh amb un 44-10 dins las malas e dimenge, Pià encaissèt un 48-22 contra lo campion 2011 de League One, Featherstone.

 

Coma qué va èsser complicat de montar una competicion equilibrada entre nòstra Elita e las formacions cap de fila de la League One.

 

En Nacionala 2, se son qualificats per la finala l’equipa de Cabardés Vilagalhenc-Argon victoriosa de St-Laurenç de Salanca 17-0 e los Catalans d’El Soler qu’an batut Trentels 23-12. La finala se jogarà dimenge que ven. 

 

En Nacionala 3, òsca per Vilanòva de Menerbés que rempòrta lo títol de campion en ganhant la finala a Aussilhon contra Lescura-Valderiés 25-20. En juniòrs nacionals, lo planchòt es per Carpentràs venceire dels aquitans de Tonens 20-14.

 

En minimes, l’Ostal dels Joves de Carcassona va visar lo doblat coma sos ainats de l’AS Carcassona en Elita.

 

Aprèp lo trofèu de la Copa, los vaquí en quista del planchòt de campion en seguida d’una bèla victòria 34-9 contra l’equipa de Sant-Martin de Crau.

 

Finala dimenge del costat de Carpentràs fàcia al XIII Catalan. En cadets, la finala opausarà Avinhon e lo XIII Catalan qu’a batut Limós 22-10.

 

A la Reula, l’equipa de França feminina a ganhat 40 a 8 contra las universitàrias anglesas.



Alan Roch