Bandièra01 1180x150: Comuna de Tolosa

Actualitats

Domenge Baudís, l’òme qu’aviá pas paur del drapèl occitan

Dominique Baudis
Dominique Baudis | Guillaume Paumier
Domenge Baudís ven de nos quitar. Foguèt president del conselh regional de Miègjorn-Pirenèus entre 1986 e 1988. Foguèt un politician un pauquet mens jacobin que los autres per çò qu’esitava pas de recórrer als simbòls istorics d’Occitània.
 
Sos predecessors socialistas al conselh regional, Alan Savary (de 1973 fins a 1981) e Alèx Raymond (de 1981 fins a 1986) avián —sabi pas quin èra dels dos, logicament lo primièr— creat per la region un drapèl de farlabica. Ne faguèt dessenhar un que, subretot, remembrèsse pas Occitània als occitans. Aquel èra compausat de uèit estelas blancas que representavan los uèit departaments sus fons blau.
 
Lo movement occitanista menèt batèsta per que lo drapèl occitan foguèsse naturalament lo de la region. Èra una batèsta simbolica, cèrtas! Mas i a pas de simbòl que siá pas politic. La pròva n’es que los socialistas franceses s’èran arrengats per que lo novèl simbòl de la region remembrèsse pas ni lo passat ni lo present occitan del país e refusèron fòrt e mòrt de far la mendre concession, quitament al nivèl simbolic. Pasmens, lo movement nacional occitan contunhèt lo combat.
 
Es de remembrar tanben la propòsta de Marc Censi, de nomenar la region de Miègjorn-Pirenèus coma Centreoccitània o Occitània Centrala, qu’e mai se reüssiguèt pas, los occitanistas seriam inspirats de reprene.
 
En 1986, per las primièras eleccions regionalas (precedentament lo conselh regional èra un conselh de notables) se faguèt campanha. I aguèt de listas occitanistas en País Tolosan e en Albigés. Es al debanar d’aquela campanha, exactament a La Vaur, que Domenge Baudís s’engatgèt publicament, s’èra elegit, de tornar lo drapèl occitan sus la region. E mai tenguèt sa promessa. Òc ben, Domenge Baudís foguèt l’òme qu’aguèt pas paur del drapèl occitan. Li devèm almens aquò!




Sèrgi Viaule/redaccion

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Laurenç Gavotina
6.

#3 Tòni,

adieu e te vòlo grandmercear sincerament per la tieu intervencion.

As capit las problematicas generaas en matèria d'identitat interoccitana. Se una region occitana acaparra de simbèls, a de consequéncias dins d'autras regions occitanas que los an plus a posita per las acceptar coma simbèls pertejats. Devènon de simbèls pròpres per un endrech, donca ges per los autres. Es basic, colhon, mas es la realitat.
Aquela crotz (sensa estèla) de la maison dals Comtes de Tolosa es tanben aquela de la region Lengadòc, de Ròse-Alps (per Ardecha), d'Alvèrnhe (per Léger Naut), de Provença-Alps-Còsta d'Azur (Comtat Venaicin-Forcalquier, Dalfinat).

Çò que fa : exit la crotz occitana de la bandiera de la region Lengadòc-Rosselhon.
Çò que fa que dona d'arguments a aquelos que sostènon una region Provença-Alps-Còsta d'Azur fòra de l'espaci occitan.

Çò que recòrda l'importància de la crotz amb l'estèla dals set rais dal Felibritge. Solet meian de diferenciar aüra la "crotz de la vila de Tolosa" e "de la region MP", de la crotz d'Occitània tota.

  • 6
  • 0
Gerard Joan Barceló Pèiralata
5.

#4 Puslèu que de cambiar lo nom de Miègjorn-Pirenèus en una problematica "Occitània centrala", vaudriá mai pensar a sa fusion amb Lengadòc (bensai sens Catalonha Nòrd), non?

  • 9
  • 0
Domergue Sumien Ais de Provença
4.

#1 Es verai que l'òbra de Baudís se limita pas una istòria de drapèu.
#2 Acòrdi totau amb Terric Lausa. Baudís assumissiá pas la defensa de l'occitan coma deviá.
#3 Acòrdi totau amb Tòni. Renommar Miegjorn-Pirenèus en "Occitània Centrala" es una trapèla que risca de "desoccitanizar" la percepcion deis autrei regions occitanas. O disi coma provençau e coma occitanista.

  • 4
  • 2
Tòni
3.

Tornar batejar Miègjorn-Pirenèus en Occitània Centrala seriá poscut èsser una trapèla. Las denominacions "occitan" e "Occitània" fan pas l'unanimitat, o sabèm, demest los defensors de la lenga nòstra. D'unes i veson una volontat d'egemonia lengadociana. Alara se lo Tolosan se nomenava Occitània Centrala , sos estatjants s'apelarián lèu, per facilitat , tot simplament " los Occitans ".
Lo meteis dangièr s'es aglenat tanben darrièr l'adopcion del drapèu nacional occitan, dins sa forma integrala, per una region .... Solament avèm talament de plaser a lo veire flotejar qu'anam pas lo traire d'aquí ont capitèrem a lo far quilhar !

  • 7
  • 0
Terric Lausa Quilhan
2.

En matèria d'occitan, Baudís, la patz per la siá arma, foguèt tanben l'òme, president del CSA, que volguèt pas donar una frequéncia de difusion a Ràdio Lenga d'Òc, en li preferir de ràdios franchimandas comercialas.

Baudís servicial del sieu territòri? Benlèu òc, mas un servicial estirat entre provincialisme tolzan e admiracion per l'estat francés.

  • 11
  • 1

Escriu un comentari sus aqueste article