Lo Bascoat festegèt dimenge passat lo jorn nacional, nomenat en basco Aberri Eguna (lo jorn de la pàtria) amb un ton mai independentista que jamai. D’un costat, lo president de la comunautat autonòma del Bascoat, Iñigo Urkullu, demandèt, dins son discors als actes de Gernika, que se reconeguèsse “la realitat nacionala basca” e faguèt una crida a “l’acòrdi e a la negociacion, coma alternativa pel Bascoat, Catalonha, Escòcia e Flandra dins Euròpa”.
 
Los autres partits basquistas manifestavan amassa a Pampalona en jonhent la crida del ret Independentistak. Dins aquela capitala istorica del Bascoat, qualques desenats de milièrs de manifestants demandèron l’independéncia del Bascoat.
 
A la fin d’aquela manifestacion, se debanèt un acte politic amb de representants de l’Assemblada Nacionala Catalana (ANC) e del Partit Nacional Escocés (SNP).
 
La pòrtavotz del ret Independentistak, Garbiñe Bueno, diguèt als mèdias que “l’independéncia es la sola alternativa reala d’avenir capabla de respondre als desirs e besonhs dels ciutadans bascos”.