Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Aubèrt: an trobat un orsalhon davant la pòrta d’un ostal

Los agents de l’environament del Govèrn d’Aran an pas capitat de ne trobar la maire

| Conselh Generau d'Aran
Los agents de l’environament del Conselh General d’Aran ensajan, dempuèi una setmana, de trobar la maire d’un orsalhon que trobèron lo 17 d’abril passat davant la pòrta d’un ostal al vilatge d’Aubèrt. Es lo primièr còp qu’un ors se sarra tant d’un nuclèu abitat per d’umans.
 
L’orsalhon se mòstra completament desorientat, çò que fa mai complicat lo prètzfach dels agents environamentals araneses. De fach, an ensajat qualques còps, en divèrses endreches, de liberar l’orsalhon en montanha per veire s’èra capable de seguir la tralha de sa maire, mas l’animal bolega pas.
 
L’orsalhon es una femèla d’ors brun qu’a solament tres meses. Se’n desconeis l’origina, se mòstra totjorn agressiva e fugís la preséncia umana. Los agents del govèrn d’Aran l’an alimentada e li an mes un transmetedor per la seguir e per ne conéisser la filiacion e l’origina: “Es agents de miei ambient deth Conselh Generau d’Aran haràn un seguiment exaustiu des movements der orsardet entà poder constatar, en cas que se produsisque, eth retrobament damb sa mair”, çò declarèt lo conselhièr de l’agricultura, l’elevatge e l’environament del Conselh General d’Aran.
 
Per contra, lo govèrn aranés refusa de tutelar l’aculhiment de l’animal dins un centre de recuperacion de fauna. “Era massificacion d’orsi en centres de captivitat ei un problèma actuauments en estat espanhòu, a on actuauments i a practicaments un vintenat d’orsi e se cèrque d’auti centres entà replaçar-los”, çò declarèt lo sindic d’Aran, Carlos Barrera.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ferriòl Macip
2.

Eth Conselh Generau d'Aran que miarà ar ossardet entà un barrat provisionau laguens un bòsc dera Val d'Aran condicionat mès damb dificultat d'accès entà garentir er isolament der animau e es persones. Aquiu que se l'alimentarà mès que s'evitarà era sua familiarizacion damb es umans. Mès informacion sus eth sit web deth Conselh Generau d'Aran.



  • 2
  • 0
Pirolet
1.

E ben! Se a cò els orses i a tanben de mairas indignas...

  • 1
  • 0

Escriu un comentari sus aqueste article