Bandièra01 1180x150: Comuna de Tolosa

Actualitats

Espanha: an arrestat 21 usatgièrs de Facebook e Twitter per far d’“apologia del terrorisme” sul ret

Aqueles usatgièrs se serián trufats de qualques victimas d’ÈTA o aurián donat la benvenguda a de presonièrs meses en libertat

La gàrdia civila espanhòla detenguèt diluns passat 21 personas per aver fach d’“apologia del terrorisme” e per aver “otratjat las victimas d’ÈTA”, amb lors publicacions sus Facebook e Twitter. Quinze d’aqueles detenguts son del Bascoat, del temps que los autres son de Catalonha, Galícia, Astúrias, Castelha e Leon. S’agís d’usatgièrs qu’an aperaquí dos mila seguidors sus Facebook o Twitter, e que segon la polícia aurián publicat mens de cinquanta messatges “amb un contengut violent”.
 
Segon çò que rapòrta Vilaweb, l’operacion es encara viva e i poiriá aver mai de detencions.
 
Segon de fonts de la gàrdia civila publicadas suls mèdias espanhòls, “aqueles usatgièrs se trufèron de qualques victimas d’ÈTA”.
 
Lo jornal espanhòl El Mundo ditz qu’aqueles messatges “manifestavan lo desir qu’ÈTA contunhèsse d’atemptar, donavan la benvenguda als presonièrs bascos que sortissián de preson, visavan de personas per que foguèsson objècte d’atemptats e fasián de referéncias umiliantas als damatges fisics patits per las victimas”. Las fonts policièras que mandèron l’informacion a aquel jornal apondèron que la tòca d’aquelas detencions “es de servir d’exemple als autres”.
 
Lo jornal basco Naiz.info rapòrta l’identitat de qualques unes dels detenguts, e relata d’acamps de protèsta en Gernika e Vitòria.
 
Segon lo jornal El País, l’afar comencèt amb una enquèsta sul compte Twitter @HumorNegro, que publicava de galejadas d’umor negre e que s’èra trufat de la discapacitat d’Irene Villa, que perdèt sas cambas en un atemptat d’ÈTA.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid
5.

#4 Çò qu'ei lo GAL?
Un POTH terrorista?

  • 2
  • 0
Ernèst Guevara Jr. L'Avana
4.

#1 Me demandi, ieu, se la Guardia Civil aurián arrestat semblablament, gents qu'aurián practicat l'apologia de las accions del G.A.L., o que se serián trufadas de sas victimas…

  • 3
  • 0
Pimflòid
3.

Aquera paja twitter "humor negro" que sembla plan hastiau de tot biais. En legent ua minuta qu'èi trobat :

"reussir a melhorar lo CI d'Espanha : 1 Ressucitar Hitler 2 Amuishà'u los gitanas de díse'u qu'ara los judius se vesteishen atau 3 Esperar" (sèi pas çò qu'ei lo CI)

" Perqué las hemnas an un neuròne de mei que las vacas? Entà que non bramen pas quand e'us tocam las popas"

Que l'aurén devut aperar "humor racista y sexista" meilèu!

Lheu los tipes de la guardia civil son fans d'aquò e estón chocats de véder umor "negre" dab ETA suu lor sit preferit?

  • 2
  • 0
Ivan
2.

#1 Segur! Mas pas per se far acusar d'apologia del terrorisme

  • 3
  • 1
Domergue Sumien Ais de Provença
1.

Se trufar de la victima d'un atemptat es un acte abjècte, insuportable.

  • 3
  • 0

Escriu un comentari sus aqueste article