Bandièra01 1180x150: Comuna de Tolosa

Actualitats

Rugbi XIII: los Dracs son diabolics

| A Lesinhan, los sostens mancaràn pas de crompar un camisòt dimècres de matin sul mercat
La partida d’aqueste dissabte a Brutus, fàcia als Diables de Salford, permet als Dracs de se tornar plaçar dins la corsa per las pelhòfas de la Superliga. Olivièr Elima, tocat a la cuèissa a l’entraïnament, daissava sos companhs, mas Julian Bosquet apelat a la tota darrièra minuta anava tenir sa plaça coma cal. Tre la primièra minuta, Morgan Escarré marcava, puèi Pryce lançava l’alièr Millard per una novèla realizacion abans qu’Escarré, mes sus orbita per Pelissièr, tornèsse un còp de mai darrèr la linha. Amb doas transformacions de Barthau, los Dracs menavan 16-0. Mas los Diables sortissián de lor retenguda e lo dobertura Chase fasiá de misèrias a la defensa catalana que plegava tres còps abans la pausa, en seguida de cordeladas de cadenas anglesas de tenguts: 18-16 pels Roges de Salford. A la represa, Pryce servissiá Zèb Taia dins lo trauc e los Dracs tornavan passar davant: 22-16. Mas l’arbitre tampava los uèlhs sus una passa enabans monumentala que permetiá a Salford de tornar prene l’avantatge: 24-22. Segurs d’eles, los angleses jogavan una penalitat a la man, perdián la pauma, Julian Bosquet traucava, trapava Pryce a nautor que filava fins als pals angleses. Barthau transformava, puèi ensacava una penalitat. Duport s’infiltrava entre dos defensors roges e passava la pauma a Escarré qu’anava plantar son tresen ensag de la serada. Per faire bona mesura, Pelissièr mandava un tombat entre los pals e los picars de man e crits de sosten redoblavan dins las tribunas. La victòria (37-24) permet als Dracs de ragantar lo grop dels candidats a la qualificacion per las pelhòfas.
 
De notar la victòria de Leeds, que confirma atal sa primièra plaça, sus Wigan 28-12. Bradford bat Warrington 34-28 e es justament a Warrington que jogaràn los Dracs aqueste divendres (retransmission a 9 oras de la nuèit sus Be In Sport).
 
De l’autre costat de la planeta, divendres, se debanava a Sydney l’ANZAC-tèst. Los Kiwis presentavan una esquipa rejovenida que menèt 18-12 a la pausa, mas la maquina australiana èra tròp fòrta: 30-18 al final pels Cangorós.
 
Dissabte a Penrith, Samoa e Fiji se disputavan la quatrena plaça pel Torneg de las Quatre Nacions de la tardor venenta. Fiji entamenava plan la partida, mas perdiá son mesclanha-menaire de jòc. Un baloard se dobrissiá pels samoans que se ganhavan la bilheta 30-18. Los carcassoneses poguèron véser lor jogaire de las annadas passadas, Osea Sadrau, jos las colors fijianas.
 
 
Finala en temps de guirguilhs
 
Dissabte, a 3 oras del vèspre, se tendrà la finala del campionat d’Elèit a Brutus (a 3 oras e 5 minutas, que la partida serà retransmesa per France 3 Sud) entre Lesinhan e Tolosa. La maquina tolzana es en plaça, mas Lesinhan compta amb sas valors: lo nhac, la solidaritat, l’esperit d’iniciativa e la volontat collectiva. La sangueta del papeta e lo sosten de totas Corbièras, qué! Aquò serà sufisent per empachar lo doblat del TO? Mas la question del debanament e del format del campionat venent se pausan. La Federacion tornariá prepausar la meteissa formula qu’ongan amb solament 8 clubs en Elèit 1 e competicion en dos temps amb mescla dels clubs d’Elèit 2 dins la segonda fasa. Tolosa se deuriá engatjar en Anglatèrra e marcar sa resèrva dins l’espròva francesa. Lo president de l’AS Carcassona, En Guilhèm, trapa qu’aquò manca d’ambicion e o a fait saupre publicament e amb corrièrs als autres presidents. Resulta: una convocacion a passar davant la comission de disciplina de la Federacion lo dimècres 21 (dos jorns aprèp l’amassada generala de l’ASC e un mes abans l’acamp federal). Lo XIII s’amerita melhor qu’aquelas discussions estèrlas. De seguir.
 
En dobertura de la finala bèla a miègjorn e mièja, coma per la Copa Nitard, la finala del campionat junior serà un afrontament entre lo Tolosa Olimpic e Limós, qu’en mièja finala a ganhat contra los catalans 42-32.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article