Bandièra01 1180x150: Comuna de Tolosa

Actualitats

Contunha la resisténcia contra lo projècte d’un barrage al bòsc de Sivens

Dempuèi novembre, un grop d’activistas ocupan l’airal per evitar que se nègue 35 ectaras dins la zòna umida del Testet, malgrat la repression policièra

| Tant qu'il y aura des bouilles
Malgrat la repression policièra, contunhan las mobilizacions, que dempuèi novembre passat ressistisson contra lo projècte d’una restanca dins la zòna umida de Testet, al bòsc de Sivens (Galhaqués).
 
D’activistas del collectiu Tant Que i Aurà de Bolhasses i Aurà Pas de Restanca avián resistit, suspenduts dins los arbres, dusca a la fin de febrièr, quand los gendarmas desmontèron l’estructura de fusta que los aculhissiá, e après que lo conselh general de Tarn, proprietari de las tèrras e promotor de la restanca, apelèsse la justícia. Tanben los gendarmas desmontèron lo capitèl de circ ont s’assostava lo collectiu. Mas a l’ora d’ara i a almens tres campaments, dins los quals entre 50 e 80 personas fan pression per servar lo país e l’environament, segon un reportatge que publica Libération.
 
La restanca prevista, d’un milion e mièg de mètres cubes d’aiga, negariá aquela part de la val de Tescon, en tot far desaparéisser 13 ectaras de zòna umida. “I a aperaquí un milion d’armas d’animals salvatges, de granhòtas, de peisses o de salamandras”, çò ditz a Libération Sylvain, un dels activistas. Per contra, lo conselh general de Tarn cita lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna, çò que los ecologistas creson pas. Sylvain apond: “nos opausam tanben a aqueste projècte per mostrar la faiçon dont voldriam viure”, çò ditz, en nuançant que “voldriam viure en rompedura amb la dictatura del profièch”, e en tot senhalar que lo projècte es finançat per de fonzes publics per favorir solament d’interèsses privats.
 
Aquel collectiu emplegan lo tèrme francitan bouilles, en definir los bolhasses coma “de tèrras o pradas umidas sens valor financièra”, en tot ne revendicar lor preservacion, e tanben de totas las 35 ectaras de zòna umida menaçadas per la restanca. Denóncian que la tòca del projècte es de favorizar l’agricultura intensiva e que, per tant, es un perilh per un centenat d’espècias “protegidas” dont cinc son ja declaradas menaçadas.
 
Cridan d’individús, de comitats, de collectius e d’autras fòrças de resisténcia a organizar d’accions descentralizadas al ras de las entrepresas e las institucions engatjadas dins lo projècte de restanca: CACG, Ador-Garona, conselhs generals de Tarn e de Tarn e Garona e tanben las prefecturas, lo Ministèri de l’Ecologia, las comunautats europèas, etc.
 
Lo collectiu que son a abitar la zòna, per empedir la construccion de la restanca, declaran que lor “resisténcia es dinamica e creativa” e que luchan “contra un sistèma de las idèas e de las practicas, mas dins cap de cas contra d’individús”. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
1.

Lo costat tecnic de la restanca que serà assegurat per ua entrepresa bascò bearnesa qui a dejà hèit hòrt de barratges entà que paisans podossen adaigar lo milhòc lo vrèspe en plen estiu.

Aqueste collectiu qu'a rason de deféner la tèrra atau com ei contra los qui ac vòlen tot milhoquisar.

  • 0
  • 0

Escriu un comentari sus aqueste article