Bandièra01 1180x150: Comuna de Tolosa

Actualitats

crotz-tolosaCreated with Sketch.Comtat de NiçaCostiera Niçarda

Atemptat a Niça contra una milionària monegasca

Hélène Pastor, amiga intima del prince Albèrt II e membre d’una de las familhas mai ricas de Mónegue, foguèt grèvament ferida per de balas en seguida d’un atac que feriguèt encara mai grèvament son menaire. L’atac se passèt dimars passat davant l’espital L’Archet de Niça, a l’entorn de 19h. Pastor, dins sos mai de setanta ans, èra anada a l’espital per vesitar son filh Gildo Pallanco Pastor, e quand sortissiá en veitura del pargatge de l’espital, lai foguèt fusilhada per dos tiraires en emboscada que l’esperavan. Segon los testimònis, los malfactors fugiguèron a pè, çò a informat la polícia a qualques mèdias.
 
Transportèron Hélène Pastor e lo menaire a l’espital de Sant Ròc, al centre de Niça. Lo pronostic vital de Pastor es pas engatjat mas l’estat de santat del menaire suscita mai de chepics, segon una font pròcha del dorsièr.
 
Lo prince Albèrt II de Mónegue exprimiguèt aquel meteis ser, dins una declaracion escricha, sa “viva emocion en sabent l’agression que ven de frapar a Niça Dòna Hélène Pastor Pallanca e son menaire”, del temps que “lor manifèsta, pereu a lors familhas, son pus prefond sosten”.
 
De son costat, lo president del conselh general dels Alps Maritims, Eric Ciotti, expliquèt dins un comunicat que la fusilhada foguèt “fòrça violenta” e que sa “sauvatjariá” choquèt la comunautat medicala. Ciotti apondèt que las circonstàncias de la fusilhada “rèstan encara de precisar”.
 
Mena l’enquèsta la polícia judiciària de Niça, que segon Le Figaro, poiriá seguir la pista de la màfia italiana. Las camèras de videosusvelhança los ajudaràn plan, bòrd qu’enregistrèron integralament l’atemptat.
 
Hélène Pastor fa partida d’una familha de las mai ricas del Principat de Mónegue, que possedís una enòrma part del patrimòni immobilièr del país. Son filh Gildo Pallanco Pastor, lo que sa maire vesitèt a l’espital, es lo president de Venturi Automobiles, lo constructor de veituras d’espòrt electricas. Lo fraire d’Hélène Pastor, èx-president del club de fotbòl AE Mónegue, que moriguèt en febrièr passat, èra un ric òme d’afars. 



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article