Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

La Querimònia, ara restaurada, es tornada al país

La Querimònia es tornada en Aran après èsser restaurada dins lo Centre de Restauracion de Bens Mòbles de la Generalitat de Catalonha. Aquel document, un privilègi concedit en 1313 pel rei Jaume IId d’Aragon a la Val d’Aran, que constituís lo drech istoric del petit país occitan. Lo document de pergamin presentava de brutícia generalizada, èra fòrça sec e aviá de rugas e de plecs, de tacas, e los quites petaces de las restauracions ancianas èran degalhats. En avent resolgut totes aqueles problèmas, es tornat als Archius de la Val d’Aran, a Arròs. Es estat tanben numerizat e se poirà lèu consultar en linha.
 
“Pendent eth procès de restauracion e digitalizacion deth document s’a procedit ara realizacion d’un vidèo de difusion, qu’arremassarà es donades istoriques e archivistiques que viren ath torn dera Carta Magna aranesa”, çò a explicat lo Sindic d’Aran, Carlos Barrera.
 
Lo cap del patrimòni e de la cultura del Conselh General d’Aran, Jèp de Montoya, presentèt aquela intervencion coma una contribucion a la mantenença de l’identitat del pòble aranés. “Es simbòls son fòrça importants pr’amor qu’amassen e junhen as pòbles. Era lengua, er escut, er imne, eth drapèu, es figures juridiques, es dances, es compilacions legaus e eth patrimòni, son aqueri simbòls que dan identitat e a cap membre que se sent d’un pòble pòt ne vò renonciar. Ei un déuer des institucions eth susvelhar aguesti simbòls pr’amor qu’en eri va era esséncia dera identitat”, çò diguèt.
 
La Querimònia autrejava la liura e franca possession als araneses de lors bòsques e montanhas, de l’aiga, de la pesca e de la caça, e tanben qualques exempcions d’impòstes e mai la reconeissença del regim economic tradicional. Mas, sustot, la Querimònia liguèt Aran a la corona reiala de Barcelona, en evitant aital lo risc que la val tombèsse en França e dins las disputas feudalas entre senhors.
 
L’an passat se’n festegèt lo 700n anniversari.
 
 
 
 
_____
— Carlos Barrera: En 7u Centenari dera Querimònia
— Maria Pau Gómez Ferrer: Era Carta Magna aranesa hestege 700 ans
— Patrici Pojada: La Querimònia permet la naissença d’una identitat politica aranesa

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article