Aqueste dimècres 18 de junh, aviá calgut tornar ajustar de sètis dins l’ANZ Stadium de Sydney per reçaupre lo public vengut veire l’eveniment (83 421 espectators per èsser exactes): pel primièr còp, dempuèi 2005, la Nòva Galas del Sud èra en mesura d’averar la tièra dels Estats d’Origina fàcia a Queensland. L’estadi se repartissiá entre los Blaus locals e los Granats venguts de Brisbane. L’enjòc primèt sul jòc e se vegèt plan mai de cargas d’avants que d’envoladas de tres quarts. Dins lo primièr temps, Thurston passava doas penalitats per Queensland. E calguèt esperar las cinc darrièras minutas per veire lo mesclanha blau Hodkinson embrumar la defensa advèrsa amb un cambiament de pè e tornar ajustar el meteis la transformacion que balhava sul fial la victòria a la Nòva Galas del Sud: 6-4. Las fusadas d’un fuòc d’artifici bèl podián montar dins lo cèl de Sydney e l’esquipa comuniar amb son public per la reconquista tant esperada del trofèu bèl.
 
Los Dracs nos faràn perir
 
Aqueste dissabte 21, los Dracs recebián a Brutus l’esquipa d’Hull FC. Los catalans avián una primièra linha dins las tribunas: Elima, assucat; Paea, nafrat, que jogariá pas contra son fraire; Pelissièr, suspendut per tres còps de punhs balhats contra St Helens.
 
Ça que la tot comencèt plan pels sang e aur amb la corsa de Morgan Escarré sus nonanta mètres per un primièr ensag, puèi la recuperacion d’una passa al pè per Olfield que la convertissiá en ensag e, se lo segonda linha Ellis puntava pels angleses, lo jove Benjamin Garcia replicava per un ensag solitari al biais d’un veteran de la bona entre los pals. Amb doas transformacions de Bòsc, los Dracs menavan aisidament 16-4 al tèrme d’una mièg temps dominada territorialament. A la represa, un ensag de Millard confirmava la dominacion catalana sus la partida. Lo mesclanha australian Sam Williams faguèt una corta primièra aparicion jol malhòt roge.
 
Mas a l’ora de jòc, tot se demesiguèt d’un còp. En doas minutas, un còp sus l’ala esquèrra, un còp sus l’ala dreita, Hull FC se jogava de la defensa locala —e òc, las Aglas de mar amb d’alas bèlas!— e, amb las doas transformacions del dobertura Rankin, Hull tornava a quatre punts: 20-16. Malgrat la calorassa estivenca, lo fregelum ganhava lo public occitanocatalan mas los Dracs trapavan las ressorsas defensivas, ajudats d’unes malbiaisses advèrses, per téner lo còp e encaisar los 2 punts de la victòria!
 
Of, s’èra plan ganhat un chuc de frucha ofèrt pels Joves Agricultors de Catalonha Nòrd! Los Dracs s’installan atal a la setena plaça del classament e remandan un adversari dirècte per las pelhòfas a 5 punts. An fait onor a totes los portaires del malhòt catalan dempuèi la naissença del XIII Catalan en 1934: anniversari-escasença d’una brava taulejada lo miègjorn a l’entorn de las carns e carnsaladas del president Guasch!
 
Dissabte, los Dracs van jogar cò de Leeds e sòmian d’un primièra victòria cò dels Rinocèros que, per festejar la partença del Torn de França de lor ciutat, jogaràn en jaune mentre que los Dracs deurián portar un malhòt dels peses roges (s’un problèma de dreits d’imatge es resolgut)!
 
 
Del costat de la Federacion
 
La setmana passada, se teniá a Albi lo Congrès annual de la Federacion; S’aprenguèt que lo campionat d’Elèit tornariá partir la sason venenta dins lo meteis format qu’aquesta sason amb uèit formacions d’Elèit 1 e dotze d’Elèit 2, que Ricard Agar èra confirmat coma entraïnaire del XIII de França que reçauprà Galas lo 25 o lo 26 d’octobre e que farà una tornada dins l’emisfèr Sud l’an que ven.
 
Res de plan novèl jol solelh tretzista en Occitània e Catalonha...
 
 
 
 
Alan Roch