Bandièra01 1180x150: Comuna de Tolosa

Actualitats

70 ans de l’Operacion Valquíria

Hitler mòstra a Mussolini l'estat de la tuta del lop après l'atemptat
Hitler mòstra a Mussolini l'estat de la tuta del lop après l'atemptat | Cropbot
L'atemptat del 20 de julhet de 1944 foguèt una temptativa d'assassinar lo dictator Adolf Hitler per, après, per mejan d'un còp d'estat, instaurar un nòu govèrn que negocièsse la patz amb las poténcias aliadas. 
 
Lo complòt, organizat per un grop d'oficièrs de la Wehrmacht (armada alemanda) bailejats per lo coronèl Claus von Stauffenberg, profechava de la possibilitat qu'ofrissiá lo plan Valquíria, que comptava amb la mobilizacion de la milícia territoriala dins lo cas d'un còp d'estat o insurreccion intèrna: pensant mai que mai a un cas de susmauta massissa dels obrièrs estrangièrs esclavizats en Alemanha (los 650 000 franceses recrutats per l'STO, Servici del Trabalh Obligatòri, per exemple) o de caos en la rèiregàrdia pels bombardaments aerians.
 
Lo 20 de julhet de 1944, un an abans la fin de la 2a Guèrra Mondiala, lo comte d'Stauffenberg placèt una maleta amb una bomba activada al dejós de la taula ont Hitler s'èra reünit amb son estat major, dins una sala de “la Tuta del Lop”, un dels quartièrs generals d'Hilter près de Rastenburg (uèi Kętrzyn, en polonés). 4 de las 24 personas que se trobavan dins la sala quand espetèt la maleta moriguèron, mas Hitler sofriguèt pas que de nafras leugièras, per çò qu'un dels presents aviá desplaçada la maleta amb lo pè pauc abans la detonacion.
 
Segurament la mòrt d'Hitler auriá avançat la fin de la 2a Guèrra Mondiala d'un an, e amb aquò aurián esparnhada la vida als 10 milions de personas mòrtas entre julhet de 1944 e mai de 1945.
 
 
 
 
Manèl Zabala

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article