Bandièra01 1180x150: Comuna de Tolosa

Actualitats

Los emperaires d’Internet se son amassats a Sun Valley

Bill Gates, Larry Page e Mark Zuckerberg, demest los assistents a la 31a edicion de la conferéncia Allen & Company

| Chalky Lives



La conferéncia se celèbra cada mes de julhet dempuèi 1983. Organizada per la banca d’investiments Allen & Company, la conferéncia aculhís los òmes d’afars, los politics e tanben las personas mai importantas dins los terrens filantropics e culturals.
 
La totalitat de l’agenda de la conferéncia es secreta fins a la darrièra minuta. Sovent i a de suspresas, en 2011 foguèt famosa l’entrevista de Bill Gates a Mark Zuckerberg.
 
Coma a cada còp las mesuras de seguretat son extrèmas. Als potentats lor agrada pas tròp de parlicar amb la premsa, normalament plaçada al prèp mas a despart. Lo centre d’atencion d’ongan son los drònes. Drònes dins l’amira del personal de seguretat, qu’espepissa lo cèl perque vòlon pas que d’aerodinas sens pilòt e telecomandadas pòscan venir fotografiar, geinar o atemptar contra los convidats. E drònes dins l’amira dels jornalistas tanben. A degun escapa que Mark Zuckerberg, director general de Facebook, Jeff Bezos, d’Amazon, Eric Schmid, de Google... investisson fòrça argent en tecnologia de drònes. En decembre de 2013, Amazon aviá presentat dins sos projèctes per l’avenir lo dròne Prime Air, un servici de remesa aeriana en 30 minutas. O deuriam veire dins un maximum de 5 ans, solament.
 
Tanben i son presents Tim Cook, director general d’Apple Inc., e son responsable de dessenh per iPad, Eddy Cue; Dick Costolo, director general de Twitter; Phil Libin, director general d’Evernote; Ursula Burns, de Xerox; Kaz Hirai, de Sony; Drew Houston, fondador e director general de Dropbox...
 
La darrièra reünion del famós grop Bilderberg se tenguèt en Copenaga del 29 de mai al 1r de junh. Coma totjorn, se tenguèron d’amassadas ermeticas. Per rapòrt a Sun Valley, benlèu avián pas tant d’interès. 
 
 
 
 
Manèl Zabala

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article