Per reçaupre los Gats Fèrs de Wakefield, aqueste dissabte a Brutus, entre las decisions de la comission de disciplina (suspension de Duport e Mounis) e las nafraduras d’avants (Elima, Lima), es una esquipa dels Dracs bravament remanejada que prepausava l’entraïnaire Fraissinós amb la titularizacion al pòst de pilars dels occitans Julian Bosquet e Miquèl Simon e la crida pel primièr còp de l’an al jove Thibault Margalet coma remplaçant. Lo segonda linha Zeb Taia se trapava replaçat al centre. Al cap de dètz minutas, Sam Williams tustava a seguir, Darryl Millard sautava pus naut que los defensors e puntava lo primièr ensag catalan. Dins la remesa en jòc, l’ataca catalana trapava la fendascla plen centre e Morgan Escarré se jogava de l’arrièr. A la vintena minuta, Eliott Whitehead marcava aprèp una corsa volontària. Caliá esperar gaire per veire Millard, cunhat sus son ala, capitar a tustar la pauma al pè e Zeb Taia èsser lo mai lèste per i quichar dessús aprèp la linha.
 
En fin de mièg temps, Elliot Whitehead se dobrissiá un baloard dins la defensa advèrsa. Amb las 4 transformacions de Williams, la marca èra de 28-0.
 
La partida baissèt d’intensitat dins lo segond temps. Los Dracs tornèron marcar per Escarré e Whitehead e pleguèron un sol còp sus una pauma perduda que l’alièr anglés Reece Lyne anèt pausar entre los pals: 40-6 a la fin pels catalans.
 
Daissan atal a distància lo ueiten Widnes, venceire de Warrington 28-14, e sustot a 5 punts lo noven: Hull KR que vei la possibilitat de qualificacion se complicar aprèp la desfaita sus sa pelena fàcia als Roges de Salford, 40-18, una esquipa ont lo catalan Fages titularizat a la mesclanha i anèt de son ensag.
 
Se vòlon anar quèrre una seisena plaça, que permetriá de jogar a domicili la primièra partida de las pelhòfas, los Dracs jogaràn un rescontre decisiu aqueste dimenge 27 de vèspre a Huddersfield.
 
De senhalar, la marca de 24-24 arrancada dins las darrièras minutas pels Tigres de Castleford cò de Leeds, redusit a 12 aprèp un carton roge per lor menaire de jòc Kevin Sinfield a un quart d’ora de la fin.
 
En Austràlia, lo lesinhanés Remièg Casty a pres una brava part a la victòria de son esquipa dels Pols de Sydney contra Penrith, 32-12, en marcant un ensag entre los pals just abans la pausa.
 
La novèla esquipa dirigenta de son club formator de l’FCL (Lesinhan) ven d’anonciar per la sason venenta la signatura de Jamal Fakir (que daissariá atal la Superliga e Bradford), coma lo retorn dels Dragonets de Bosinhac. Caldrà encara comptar amb lo finalista de la sason passada l’an que ven!
 
 
 
 
Alan Roch