Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

La 21a corsa Aran per sa Lenga remembra Mistral

Lengua Viua saluda l’IEA coma acadèmia de la lenga e demanda de politicas que favorizen l’usatge social de l’aranés

| @alexmoga
Lo centenari de la mòrt de Frederic Mistral a marcat la 21a edicion de la corsa Aran per sa Lenga, que se debanèt dimenge passat, organizada pel collectiu aranés Lengua Viua. “Qui ten era lengua ten era clau”: es totjorn lo lèma d’aquela corsa, adaptat d’un poèma del nòstre Nobel de Literatura. Los participants s’amassèron de ser a la plaça de Vielha après èsser partits, a pè o en corrent, dempuèi los tres extrèms de la Val, e en manjant o bevent amassa dins las vilas del percors. Es de soslinhar aqueste esperit convivial que marca la jornada de tot un país en movement per amor a la lenga.
 
De ser, amassats totes sus la plaça, Aran faguèt entendre un an de mai sas revendicacions per l’usatge social de l’occitan en Aran. Dins son discors, Angelina Cases, en representacion de Lengua Viua, remembrèt l’anniversari de la mòrt de Mistral amb lo 50n anniversari de Vaquèira-Beret, l’estacion d’esquí plaçada en Vaquèira que sosten la corsa e que sostenguèt las primièras emissions de ràdio en occitan en Aran. Cases se congostèt del decret de la Generalitat de Catalonha que reconeguèt l’Institut d’Estudis Araneses (IEA) coma acadèmia de la lenga, “un hèt fòrça important ath país”. Mercegèt lo Govèrn d’Aran per ofrir a gratis los libres d’estudi en aranés a las escòlas malgrat los tempses de crisi. Tanben felicitèt Mireia Boya per son filme T’estimi, dedicat a la lenga e que capitèt plan dins lo concors La Llanterna Digital, e maitot, segur, lo grop Nadau per son 40n anniversari.
 
Pasmens, Cases insistiguèt que cal trabalhar fòrça per l’usatge social de la lenga. Dins aquel sens, a demandat a las institucions de far de campanhas de socializacion “que faciliten er usatge dera lenga pertot”. Tanben a demandat que la Lei d’Aran, qu’es a se bastir dins lo Parlament de Catalonha, arribe a bon pòrt.
 
Lo prèmi Lengua Viua d’ongan foguèt autrejat a l’istoriana Maria Àngels Sanllehy, una de las cercairas mai importantas en l’istòria d’Aran.
 
Per clavar la jornada, un an de mai, Nadau faguèt sautar los joves e los grands qu’èran sus la plaça dins un concèrt fòrça animat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Òlo Pujòlo
2.

#1 Goulamàs'K, cau hèr a vier en Aran a Goulamàs'K
http://www.goulamas-k.com

  • 7
  • 0
Manèl Canejan
1.

Òc, ei ua jornada plan polida que s'acaba per ua polida hèsta.
Sò un incondicionau de Nadau mès voi hèr ua suggestion as amics de Lengua Viua : seria plan sajar de trapar un aute grop entà cambiar un shinhau. As joeni d'Aran (e as auti tanben) les haria ben descobrir d'auti grops. Pensi a Lou Seriol o a Lou Dalfin per exemple.

  • 14
  • 0

Escriu un comentari sus aqueste article