Ploviá aqueste divendres de ser sus Perpinhan. Temps costumièr per la fola dels sostens de Warrington, venguda en avion e bus, tota vestida de jaune e de blau, amb de desguisaments creatius, per beure de cervesas e cantar a plec de gargalhòl los meritis dels Lops. E la pluèja refresquèt las ambicions catalanas: los Dracs devián ganhar per esperar de jogar lo primièr torn de las pelhòfas a domicili. Un còp de mai, tota la setmana, avián proclamat lor consciéncia de l’enjòc e lor enveja bèla de sortir una partida terribla. E de que vegèrem? Una esquipa que capitèt pas a dintrar dins la partida, que manquèt de nhac e de vam, al jòc al pè previsible, sens patron sul terrenc, que barregèt rapiditat e precipitacion. Se pòt totjorn estimar que l’arbitre vidèo, en autrejant un ensag atal-atal als angleses e en ne refusant un als catalans, ajudèt pas los Sang e Aur, mas los locals mestregèron jamai la partida e passèron lo temps a córrer darrèr la marca (mercé al Michael Oldfield, autor de tres ensages). Una penalitat encaissada a la represa los daissèt fin finala a dos punts dels Lops: 26-24. Adieu, la pelhòfa a domicili! Los Dracs demòran setens al classament, se fan ratrapar —tot en gardant una melhora diferéncia de punts— per Widnes venceire d’Hull KR (28-10), que demòra a tres punts del parelh. Los catalans serián plan inspirats d’anar quèrre dos punts del costat de Salford lo 15 d’agost.
 
De notar la victòria suspresa e susprenenta de Bradford a Leeds: 20-14. Aquò permet a Saint Helens de demorar cap de fila. Aquesta dimenjada, se tendràn las mièjas finalas de la Cup: dissabte, Leeds reçauprà Warrington e dimenge de vèspre, la segonda mièja finala opausarà los Vikings de Widnes e los Tigres de Castleford. En Austràlia, la jornada èra dedicada als supereròis de bendas dessenhadas o de cinèma. Cinc esquipas joguèron amb de malhòts diferents de l’abitual per celebrar Ironman, Hulk, Tòr, Wolverine o Captain America. Las Aglas de Mar de Manly an fait lo trauc al cap del classament amb 6 punts d’avança suls segonds (los Lapinons de Sydney e las Pantèras de Penrith) e 8 esquipas son encara en corsa per las 3 darrièras plaças qualificativas. Un final a copar lo buf nos espèra!
 
D’aquel temps, Limós fa part de son recrutament estrangièr en privilegiant unes jogaires joves: l’avant neozelandés Isaac Maliota, lo pilar Harlan Alaalatola, lo centre-segonda linha Paul Ivan e lo polivalent Ben Jones, qu’a jogat un quarantenat de partidas d’NRL, serà lo cap d’orquèstra d’una formacion que s’apiejarà tanben sus la montada de 8 estagiaris sortits de sa formacion junior doblafinalista la sason passada. Aquò promet per la represa del campionat a la mitat de setembre!
 
 
 
 
Alan Roch