L’actor estatsunidenc Robin Williams es estat trobat mòrt diluns passat en cò sieu. Segon lo comunicat qu’a difondut la polícia, se suspècta que s’agiriá d’un suicidi, malgrat que l’enquèsta exaustiva dels faches se dega far a partir d’ara. Dins un comunicat, la familha “demanda de respècte per son intimitat” a causa d’una pèrda “tragica e subta”.
 
Robin Williams aviá 63 ans e protagonizèt de filmes tant aplaudits coma Good Morning, Vietnam, Dead Poets Society o Mrs. Doubtfire. En 1998 recebèt l’Oscar del melhor actor segondari per Good Will Hunting e, long de sa carrièra, recebèt tanben quatre Glòbes d’Aur.
 
Èra filh unic d’una familha rica, son paire èra un important òme d’afars de Ford. Quand èra jove voliá pas èsser actor e se consagrava als estudis e a l’espòrt. Quand sa familha s’installèt en Califòrnia, comencèt de s’interessar al teatre. Se metèt a estudiar las sciéncias politicas al Claremont Meris College de Califòrnia e, a l’encòp, començava d’estudiar l’interpretacion teatrala al Marin College. Quitèt los estudis e partiguèt a Nòva York per estudiar dins la prestigiosa Juilliard School.
 
Èra fòrça conegut per sa siá granda capacitat d’imitacions e de registres. Li agradava fòrça de mesclar l’espectacle amb lo dirècte. Aviá jogat tanben de ròtles dramatics dins qualques filmes.
 
 
Lo Cercle dels Poètas Mòrts
 
L’interpretacion que demòra benlèu dins lo cap de la majoritat de nosautres es lo filme Dead Poets Society (Lo Cercle dels Poètas Mòrts, revirat en francés coma Le Cercle des poètes disparus, en espanhòl coma El Club de los Poetas Muertos e en italian coma L’attimo fuggente). Es un filme dramatic estatsunidenc de 1989 que se debana dins una escòla conservatritz per gojats; explica l’istòria d’un professor d’anglés qu’inspira los sieus escolans per tal que càmbien lors vidas de conformitat, mejançant sas ensenhanças de la poesia e de la literatura.