Bandièra01 1180x150: Comuna de Tolosa

Actualitats

crotz-tolosaCreated with Sketch.LemosinMarchaBassa Marcha

Doas dròllas an capitat a fugir un raubaire d’enfants e a lo far metre en detencion

Lor resisténcia e lors crits fòrts faguèron fugir lo raubaire, que foguèt detengut tres jorns puèi

Chastèlponçac: la glèisa de Sant Teiric
Chastèlponçac: la glèisa de Sant Teiric | Mica
Doas drollichonas, que se passejavan en bicicleta pels camins davant lor ostal de vacanças a Chastèlponçac (Bassa Marcha), capitèron a far fugir un raubaire que las voliá raubar e a lo far metre en mans de la justícia, segon çò que rapòrta La Montagne.
 
Se passèt lo diluns 4 d’agost passat. Près d’ont elas se passejavan, lo raubaire passèt en veitura qualques còps al costat d’elas. Apuèi s’arrestèt e demandèt a l’ainada s’èra sul bon camin per anar a Becinas de Gartempa. Sul pic, l’òme sortiguèt de l’auto, dobriguèt lo còfre, prenguèt la mai petita de las dròllas e ensagèt de la metre dedins. Mas l’òme poguèt pas afrontar la resisténcia de la petita, ni los còps de l’ainada, ni los crits de las doas drollichonas que prevenguèron una vesina. L’òme fugiguèt amb lo còfre de l’auto encara dobèrt. La vesina correguèt prevenir los parents e alertèt la gendarmariá.
 
Gràcias a l’ajuda de las dròllas, la polícia poguèt establir un retrach robòt del raubaire. Se lancèt sul pic una enquèsta e tres jorns puèi se detenguèt un òme. “Sabe que venètz pr’amor de las drollichonas”, çò diguèt lo presumit raubaire als policièrs al moment de la detencion. Lo detengut reconeguèt los faches e demandèt un relambi per preparar sa defensa. Serà jutjat lo 17 d’octòbre que ven; mentretant, demòra detengut e passarà un examen psiquiatric. L’òme èra estat condemnat en 2000 a cinc ans de preson per temptativa de murtre e d’assassinat, e en 2008 per d’agressions sexualas.
 
Lo procuraire de Lemòtges, Michel Garandaux, expliquèt los detalhs de l’afar a France Info.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article