Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Es reduccions pressupostàries que mèrquen es celebracions dera hèsta nacionau dera Val d'Aran

Es reduccions budgetàries s'an tanben notat enes actes de celebracion dera Hèsta d'Aran qu'enguan se limitaràn quasi solament as actes protocolaris. Totun, era crisi non empedís qu'es aranesi commemòren aué era restauracion deth Conselh Generau eth 17 de junh de 1990, 151 ans dempús d'auer estat abolit.


Es actes que comencèren agèr damb er autrejament des prèmis literaris Mn. Condò Sambeat, entàs 19h ena Audiovisuau de Vielha.
 
Era celebracion que comence aué, com ei abituau, damb era desfilada de toti es penons portadi per representants de cada terçon dempús deth Conselh Generau enquiath Santuari de Mijaran. 
 
Entàs 11h missa solemna ena glèisa deth Santuari, e dempús dera missa, enes roïnes der anciana glèisa, s'issarà eth drapèu e sonarà er imne nacionau occitan, qu'ei oficiauments imne dera Val d'Aran segontes es sòns estriuets aranesi. 
 
Es actes qu'acabaràn damb es parlaments des autoritats, dances araneses e un dinnar institucionau. 
 
Joana Ortega, vice-presidenta dera Generalitat de Catalonha, qu'ei era autoritat catalana convidada d'enguan. 

Es prèmis 17 de junh non an cap estadi convocadi enguan, maugrat que hònts deth Govèrn d'Aran afirmen qu'eth guerdon aranés se tornarà a convocar er an que ven, en tot adaptar-lo, se cau, ara situacion economica. Deth sòn costat Unitat d'Aran ditz que s'agís d'ua decision "equivocada" de "revengisme damb es accions amiades per anterior executiu".
 
Damb era Hèsta d'Aran, e era arribada der estiu, que comence ua epòca de celebracions fòrça importantes en petit país occitan. Cau destacar-ne es hèstes deth Haro en Les, e deth Taro en Arties per Sant Joan; e sustot era Corsa Aran pera sa lengua, eth darrèr dimenge de junhsèga, a on toti es aranesi se mobilizen entara lengua nòsta.




Ferriòl Macip

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article