Bandièra01 1180x150: Comuna de Tolosa

Actualitats

China vòl connectar Euròpa e America amb de trens de granda velocitat

L’Acadèmia d’Engenhariá Chinesa a publicat un rapòrt per jónher China amb la rèsta d’Asia, Euròpa e los Estats Units

Lo ret de trens de granda velocitat de China es lo mai grand del Mond. A mai de dètz mila quilomètres e, normalament, n’auràn lo doble en 2020. En mai d’aquò, en paucas annadas, lo país es passat de crompaire a vendeire de trens e de maquinariá e expòrta sa tecnologia a d’autres païses. Sus aquela via, China cèrca d’estendre son ret e sos trens dins tot lo Mond. Literalament.
 
Segon çò que rapòrta Vilaweb, l’Acadèmia d’Engenhariá Chinesa a publicat ongan un rapòrt que detalha almens quatre grandas linhas per jónher China amb la rèsta d’Asia, Euròpa e los Estats Units.
 
L’idèa d’arribar al nòrd d’America es la mai complèxa que prepausan los engenhaires chineses. Se tractariá d’un percors de tretze mila quilomètres que sortiriá del nòrd-èst de China, trespassariá Siberia, franquiriá l’Estrech de Bering per traversar Alaska, Canadà e arribar als Estats Units. La traversada de l’Estrech de Bering se fariá amb de tunèls de dos centenats de quilomètres de long, quatre còps mai que lo tunèl de la Marga.
 
Un autre trajècte menariá los trens de granda velocitat chineses fins a Euròpa per doas grandas rotas principalas: una que menariá de passatgièrs e de mèrças de Pequin a Londres en dos jorns, en passant per Moscòu, Berlin e París; e una autra que seguiriá la Rota de la Seda en passant per las republicas de l’Asia Centrala, Iran e Turquia.
 
L’Acadèmia d’Engenhariá prevei tanben una linha de tren panasiatica per connectar China amb Singapor en passant per Vietnam, Cambòtja, Tailàndia e Malàisia. Aquela linha an ja començat de la bastir. E un autre projècte un pauc mai retardat es la connexion per tren amb l’illa de Taiwan, que prevei un tunèl d’aperaquí 150 quilomètres.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lafontan
3.

#2 Los avions son pas mei naturals, la natura seria d'arrestar de viatjar....

  • 2
  • 0
BOURDON Pau
2.

Prauba Natura !

  • 4
  • 1
Cristian FORMENT AGEN
1.

Qual(s) estat(s) prendrà(n) en carga las rotas ? Serà(an) exclusiva(s) ?

  • 3
  • 0

Escriu un comentari sus aqueste article